Ndryshe nga PD-ja që ka vendosur të bojkotojë sallën e Parlamentit, aleati i tyre, kreu i PDK-së Nard Ndoka ishte i pranishëm e nga foltorja e Kuvendit kritikoi ashpër sjelljen e shumicës.
Sipas tij deputetët socialistë duhet të reagojnë për situatën e rëndë në vend, duke theksuar se shumë marrëveshje mbyllen pa transparencën e duhur.
Gjithashtu ai vuri në dukje edhe situatën brenda mazhorancës ku vlerësoi se aleatët e vegjël, si PDK, por edhe PDIU, që janë pjesë e Parlamentit, janë lënë jashtë vendimmarrjeve.
Nard Ndoka theksoi se edhe dy Meta e Rama takohen vetëm për të mbyllur pazaret mes tyre.
Kreu i PDK, Ndoka i vetmi opozitar në sallën e Kuvendit akuzoi mazhorancën si shkaktare të bojkotit.
Ndoka tha se vendimi për përjashtimin e Berishës ishte i padrejtë, ndërsa akuzoi Metën për mungesë tolerance.
“Keni gabuar, habitem me gabimin e zotit Meta që mendoj se ka tolerancë artificiale dhe false që e kuptoj shumë mirë. Duhet të tregohet i vëmendshëm dhe tolerant jo të bojkotojë vendimin të mos bëhet pjesë e një gafe. Duke ndëshkuar me të padrejtë një ish kryeministër”,- tha Ndoka.
Më tej, Ndoka tha se mazhoranca nuk funksionin, është e çoroditur, ka probleme të brendshme dhe e ka kthyer parlamentin në vend intrigash.
“Ju kërkojnë brenda partisë, hapni kutitë dhe nuk i hapni. Si do na mbushni mendjen neve nesër në zgjedhje? Ju keni në dorë organizimin e zgjedhjeve, ju do numëroni votat tona, nga kjo rrjedh keqadministrimi i zgjedhjeve. Ndaj ju kërkoj shumë më tepër respekt, s’kemi nevojë për batuta duke e kthyer parlamentin në vend intrigash”.
