Pas mbledhjes së kryesisë së Partisë Demokratike, kreu i opozitës, Lulzim Basha ka deklaruar për mediat se kryesia miratoi kuotën prej 35 % të të rinjve në zgjedhjet e ardhshme parlamentare.
“Gjithashtu, kryesia diskutoi mbi propozimin tim për kuotën prej 35 për qind të të rinjve në zgjedhjet e ardhshme parlamentare, diskutim që i paraprin një vendimmarrjeje nga Këshilli Kombëtar i PD”, deklaroi Basha.
Lulzim Basha tha se së shpejti do të nisë një proces që do të fuqizojë, sipas tij, çdo seksion dhe nënseksion të PD.
Basha ka bërë me dije se fillimisht do të ketë emërim të sekretarëve të departamenteve të PD, disa prej të cilave janë zgjedhur.
Kështu, tha Basha, Enkelejd Alibeaj është zgjedhur sekretar për rendin dhe sigurinë publike; Ardian Turku, sekretar për pushtetin vendor; Genti Malko, kryetar i departamentit të pronave; Ervin Slianji, sekretar i aksionit qytetar; etj.
Gjithashtu, Basha bëri me dije se, kryesia vendosi të miratojë ngritjen e degës së PD në Londër, “pas shumë kërkesave të anëtarëve dhe demokratëve që jetojnë në këtë metropol”.
“PD ka përfunduar programin një vit para zgjedhjeve, duke shënuar një tjetër standard demokratik europian karshi qytetarëve”, tha më tej Basha.
Ai theksoi se, “kryesia i ka hapur rrugë diskutimit masiv të PD”. “Do bisedojmë me qytetarët për platformën e PD për të nxjerrë vendin nga kriza”, shtoi kreu i opozitës.
