“Edi Rama po fsheh planin e tij, për të kthyer në pallat fushën tek aneksi i Stadiumit Qemal Stafa, për të ndërtuar një kullë betoni ku besohet se kumbari ka bashkuar interesat e dy bandave të tij të preferuara: Të Shullazit dhe Hakmarrjes për Drejtësi”.
Kështu ka deklaruar sot kreu i Departamentit të Sigurisë në PD, Enkelejd Alibeaj, i cili ka vijuar denocimet e tij ndaj projektit të stadiumit. Alibeaj ka bërë publike pamjet e një fushe që ishte parashikuar të bëhej lulishte por që sipas tij, do të betonizohet.
“Ne e denoncuam dy ditë më parë këtë projekt kriminal të Edi Ramës. Ai heshti. Heshti, sepse ai është arkitekti i zhdukjes së kësaj hapësire, i kthimit të saj në një masiv betoni për interesat e tij dhe të bandave të tij. Kjo fushë që shihni në ekran, ishte parashikuar të bëhej lulishte dhe ishte përfunduar projekti i saj nga bashkia e drejtuar nga z.Basha. Një projekt që është hedhur poshtë tashmë, dhe ku pritet të mbillet nga Edi Rama pallati i bandave”, tha ai.
Sipas Alibeajt, Edi Rama vazhdon kështu pa u ndalur në trajtimin e Tiranës si plaçkë, në ndarjen e trojeve më të çmuara të qytetit për klientët dhe banditët e tij.
“Qytetarët e Tiranës nuk mund të lejojnë që Edi Rama t’u marrë fushat, hapësirat, liqenin, parkun, stadiumin, për të ushqyer bandat dhe klientelën e tij. Eshtë koha e një bashkimi të fuqishëm kundër këtij sundimi kriminal”, deklaroi ai.
