Kryetari i degës së Partisë Demokratike të Gjirokastrës, Roland Bejko ka reaguar lidhur me një ngjarje të rëndë që ka ndodhur në Gjirokastër ku babai i kryetarit të LSI në Gjirokastër, Sefer Dina 57 vjeç ka qëlluar me shkop duke e lënë pa ndjenja 43-vjeçaren Aleksandra Pula.
Pas kësaj, gruaja është dërguar në spitalin e Gjirokastrës ndërkohë që agresori është liruar nga policia pas një ore.
Konflikti ka ndodhur pas një debati mes tyre për kullotën ku gruaja i kërkoi Dines që të hiqte bagëtitë pasi i kishin dëmtuar kullotën. Pas kësaj ai i ka qëlluar në pjesë të ndryshme të trupit me shkop nga ku duken edhe në foto të nxirrat dhe shenjat e goditjeve.
Nga ana tjetër, bashkëshorti i të dëmtuarës, Enton Pula thotë se agresori pas një ore u lirua nga policia, me pretendimin se djali i tij është kryetar i LSI për zonën. Ai ka bërë thirrje që të vendoset drejtësi për dhunimin e bashkëshortes së tij, në të kundërt do të bëjë vetëgjyqësi.
Ja çfarë shkruan Roland Bejko:
POLICIA E GJIROKASTRËS LIRON DHUNUESIN (RAHËSIN) E GRUAS NGA ZHULATI I LIDHUR ME LSI
Policia e Gjirokastrës nuk ka kohë të mbrojë qytetarë se është duke mbrojtur kriminelët dhe aferat e tyre.
Situata e rendit në Gjirokastër ka dalë jashtë kontrollit.
Çfarë duhet të bëjë më tepër një i çmendur që masakron një grua në këtë gjendje që të kalbet në burrg?!
Ftoj organizatat për mbrojtjen e të drejtave të njeriut dhe të grave, avokatin e popullit, deputetet dhe deputetët të reagojnë fuqishëm.
( Në këto çaste jam me familjarët e viktimave të cilët kanë mbetur pa fjalë nga veprimi i policisë)
