Partia Demokratike ka deklaruar sot se kryeministri Edi Rama kishte dijeni për kërcënimet e Emiljano Shullazit, por ia delegoi çështjen ministrit të Brendshëm, Saimir Tahiri.
Në një prononcim para Kryesisë së Kuvendit, deputeti i PD Oerd Bylykbashi, deklaroi se ish-rektori Dhori Kule e ka vënë në dijeni kryeministrin Edi Rama për kërcënimet ndaj tij dhe kandidatit për rektor Mynyr Koni.
“Zoti Dhori Kule ka denoncuar faktin se pasi ka bërë me dije kryeministrin për këtë kërcënim, kryeministri e ka dërguar tek ministri i brendshëm i cili siç bëri edhe me Durim Bamin, përsëri rektorit në detyrë i premton që do ta zgjidhë ai çështjen. Provat tregojnë se si kjo qeveri është e lidhur kokë e këmbë me krimin dhe vetëm nëpërmjet krimit dhe Shullazit mund të menaxhojë jetën e qytetarëve shqiptarë”, tha Bylybashi.
Deputeti i PD tha se po mos të kishte ndërhyrë prokuroria, Tahiri do ta kishte menaxhuar në mënyrë informale çështjen.
“Mos të kishte ndërhyrë prokuroria do të ishim para asaj që Tahiri di të bëjë më mirë, do të menaxhonte në mënyrë informale siç ka bërë edhe me trafikantët e drogës, duke menaxhuar krimin dhe duke e kthyer Shqipërinë në një plantacion me drogë, ku jeta e qytetarëve vlen zero”, tha ai.
Bylykbashi theksoi se Berisha u dënuar për t’i mbyllur gojën opozitës dhe për t’u thënë shqiptarëve që nuk mund ta kundërshtojnë këtë qeveri.
“Jemi para rënies së shtetit dhe para rënies nuk mund të ketë garanci për shqiptarët veçse t’i përgjigjen kësaj qeverie. Dënohet Sali Berisha ai që denoncon këtë krim, për t’u thënë shqiptarëve që askush nuk mund ta kundërshtojë këtë qeveri në zgjedhjet që afrojnë. Provë më të madhe se kjo në inkriminimin e kësaj qeverie nuk mund të ketë”, tha ai.
