“Një ngjarje e rëndë ka ndodhur sot në orën 6 e 30 të mëngjesit në mes të Sukthit ku një bandë e armatosur me kallashnikov dhe me maska ka dhunuar biznesmenin Osman Pana”.
Ky është denoncimi i Partisë Demokratike, e cila akuzon kreun e Bashkisë Durrës, Vangjush Dako si dhe kryeministrin Edi Rama si te lidhur me maskat.
“Sipas të dhënave paraprake mësohet se ky ishte një paralajmërim i bandës ndaj biznesmenit dhe besohet se ngjarja vjen pas gjobës që banda i ka vënë ndaj tij. Terrori i këtyre bandave në Sukth është i pranishëm prej kohësh, dhe policia e di kush janë personat, por nuk merren masat, sepse maskat e armatosura janë të lidhura me Vangjush Dakon dhe Edi Ramën. Janë të njëjtët banditë që kanë terrorizuar qytetarët në zgjedhjet e fundit lokale, që kanë dhunuar komisionerët, banditë që ishin në shërbim të Dako-Ramës”, tha kreu i departamentit të sigurisë në PD, Enkelejd Alibeaj.
Ai i bëri thirrje prokurorisë të hetojë e të nxjerrë para ligjit autorët.
“Ky është sundimi i krimit të veshur me pushtet, në Sukth dhe në gjithë vendin. Partia Demokratike i bën thirrje prokurorisë të hetojë me shpejtësi e të nxjerrë para ligjit këta banditë që dhunojnë, vendosin gjoba e terrorizojnë qytetarët. Është koha e një bashkimi të madh kundër krimit e bandave. Ne nuk mund ta lëmë vendin peng të maskave e gjobvënësve të Edi Ramës, Vangjush Dakos dhe Sajmir Tahirit”, theksoi Alibeaj.
