Ish ambasadori amerikan në Shipëri, William Rajerson ka folur për të kaluarën e Shqipërisë, kur ai përfaqësonte Shtetet e Bashkuara të Amerikës. Duke folur për Zërin e Amerkës, Rajerson riktheu edhe njëherë një ngjarje të “lënë në harresë” nga aleanca PS-LSI; video-përgjimin e Ilir Metës në Fiks Fare, në vitit 2011.
Diplomatit amerikan i duket e tmerrshme ajo që ndodh me riciklimin e personazheve politike. Ish ambasadori i referohet qartësisht rastit të Ilir Metës, që pasi u filmua duke ndërhyrë për favore tek ish Ministri i Ekonomisë, Dritan Prifti, sot është në politikë në një nga postet më të larta shtetërore, Kryetar Kuvendi.
“Lexoj për shembull – nuk kam qenë atje, nuk e kam parë – se si një zyrtar shumë i lartë është i regjistruar në video duke marrë bakshish dhe ai vazhdon të jetë në pushtet. Një gjë e tillë duhet ta ishte arsye për ta larguar por nuk ka ndodhur dhe kjo është e tmerrshme”, deklaroi ish ambasadori amerikan, që vazhdon t’i ndjekë me interes zhvillimet në Shqipëri.
Në një takim me Donald Lu, Rajerson madje ka bërë humor me deklaratën e tij për zyrtarët e korruptuar që mbajnë ora të shtrenjta.
“E di që ambasadori (Donald) Lu e ka kritikuar shumë hapur korrupsionin dhe kur ishte këtu gjatë vizitës së kryeministrit (Rama) e takova dhe i thashë: “Don, shiko, ora ime është plastike” dhe ai qeshi. Sigurisht ky është vetëm një element. Korrupsioni e ka dëmtuar keq rritjen dhe ekonominë e vendit”, ka thënë Rajerson në intervistën për Zërin e Amerikës.
http://www.zeriamerikes.com/media/video/3299778.html
