Kryetari i Partisë Demokratike Lulzim Basha zhvilloi një bashkëbisedim me tregtarë dhe banorë të Rrëshenit. Zoti Basha u njoh me shqetësimet e tyre, ndërsa premtoi energji falas deri në 200 Kw për familjet në ndihmë ekonomike, kur PD të jetë në pushtet. Banorët janë ankuar për largimet abuzive nga puna, taksat e larta, rënien e fuqisë blerëse etj. Një nga shqetësimet masive, ishte energjia elektrike, çmimi i së cilës, sipas PD jo vetëm është rritur por kërkohen detyrime të cilat janë paguar njëherë.
Ish-mësues: Unë jam i larguar i penalizuar vetëm se kam denoncuar zyrën arsimore në Mirditë për aferat që kanë bërë.
Basha: Çfarë denoncove?
Ish-mësues: Sot marrin mësues që japin Gjuhë-Letërsi pa arsim përkatës, jashtë profilit. Mësuesit që japin sot mësim abuzojnë me fëmijët me aftësi të kufizuara, që nuk ka qoftë edhe një dokument, nuk ekziston kund. Fëmijët e fshatit Peshqesh bëjnë 14 km në këmbë për të shkuar në Reps. Shkolla është mbyllë në Shpal vetëm e vetëm për të mbajt një shkollë tjetër në këmbë edhe atyre fëmijëve iu thuhet rrinë edhe ke shpija ju se dëftesat dua ua japim, ju thonë.
Banorë: Për dritat i kam paguar, i kam të vulosura, i kam të firmosura. Thotë hajde paguaj prapë. Unë nuk i paguaj më, veç kur të më venë hekurat.
Tregtar: Ne na kanë përdor për vota, tani na mbyllin edhe numrin e telefonit.
Tregtar: Një familje sikur jam unë me pesë vetë, isha debitor 200 mijë lekë të vjetra. Fëmijët e mi as në kohën e komunizmit 50-vjet nuk kanë ndenj në terr. Kanë shkuar me qira 20 ditë deri kur ia kam arrit që t’i marr borxh që të laj 200 mijë lekëshin.
Tregtarë: Kam qenë shitës mishi kam kaluar roje mishi.
Banor: Unë jam socialistë një herë, po ta kallëzoj. Jetoj vetë i pesti ke shpija me 65 mijë lekë të vjetra. Më kuptoni drejt, ça do të bëhet me këtë popull. Thash po jetoj unë familjarisht por janë shumë familje kështu që po jetojnë, se kështu është nëse doni me fol drejt.
Basha: Ja si i kanë ndërtuar dy Shqipëri. Një Shqipëri të vuajtjes, të mjerimit, të padrejtësisë, të arbitraritetit e të gjobave për shumicën dërrmuese të shqiptarëve, pa dallim demokrat dhe socialistë. Dhe një Shqipëri të oligarkëve si Koço Kokëdhima që del para gjykatës dhe thotë :“Po pse po më dënoni për vetëm 2 milionë lekë”. Po sigurisht se është mësuar Koço 2 milionë këtu, 20 milionë atje, 200 milionë këtu, Albpetrolin atje, Armon këtu, sarajet atje dhe i duket çudi që ligji mund ta kapë edhe për 2 milionë, ndërkohë që shqiptarët janë dergjur burgjeve edhe për 3 mijë lekë të reja.
Në bashkëbisedim me të rinjtë dhe banorë të Rrëshenit, papunësia ka qenë kryefjalë e shqetësimit të tyre. Zoti Basha ka theksuar se punësimi i shqiptarëve do të jetë prioriteti numër një i tij si kryeministër i ardhshëm. Dhe për këtë Partia Demokratike, tha zoti Basha ka platformën e saj që nis me uljen e taksave, siguri juridike për investitorët dhe kthimin në ekonomi të 1 miliard eurove, që sot përfundojnë në xhepat e qeveritarëve. Falja e kamatëvonesave dhe energji falas deri në 200 kë në muaj për familjet në ndihmë ekonomike është një tjetër hap i parashikuar në programin e Partisë Demokratike.
Basha: Po si mund të rritet ekonomia kur kapitali, investitorët kanë frikë të investojnë?! Sepse po të hapin një investim i pari do tu vijë taksidari, i dyti do të vijë zyrtari i korruptuar që do të kërkojë pjesën e vet për një licencë, për një leje, i treti do të vijë krimineli me mbështetje qeveritare që do të kërkojë gjobën me pistoletë në kokën e biznesmenit. Detyra numër një e qeverisjes së ardhshme të demokratëve do të jetë punësimi i rinisë shqiptare dhe për këtë ne do të bëjmë gjithçka. Kemi propozuar dhe do të ekzekutojmë që javën tonë të parë faljen e kamatëvonesave dhe borxheve të energjisë elektrike të pakonfirmuara por përmes sistemit aforfe. Dhe do të vendosim për të gjithë familjet në nevojë ekonomike sasinë prej 200 kw në muaj falas, të paguar drejtpërdrejtë nga buxheti i shtetit dhe të njëjtën gjë edhe për faturën e ujit.
