Partia Demokratike ka denoncuar sot të tjera fakte në lidhje me stadiumin e ri Arena Kombëtare. Zëdhënësja e PD-së, Ina Zhupa tha se Edi Rama ka zgjedhur për ndërtimin e ‘qendrës tregtare’ nje arkitekt italian i njohur për ndërtimin e kullave të betonit me bekimin e Ramës.
“Thellohet afera korruptive me stadiumin Qemal Stafa. Edi Rama ka perzgjedhur për planin e tij klientielist dhe korruptiv të ndërtimit të qendrës tregtare dhe kullës, në vend të stadiumit, arkitektin Italian Marco Casamonti, i njohur në Shqipëri për ndërtimin e kullave të betonit me bekimin dhe mbështetjen e Ramës, si pallati 24 katësh, në krah të Gjykatës së Lartë. Po ashtu në 2008 ishte anëtar i jurisë për projektin e Sheshit “Skenderbej” që nxori fitues projektin e Anri Salës dhe firmës belge të vajzës së Linda Ramës, projekt që Veliaj parashikon ta ndërtojë së shpejti në shërbim të shefit të tij”, tha Zhupa.
Sipas PD, ky arkitekt ka në Shqipëri për ortak Alban Eftimin e Atelier 4, klientin e Ramës që fitonte 70 përqind të projekteve të Bashkisë.
“Ortaku i tij shqiptar Albani Eftimi mesa duket ka kaluar nga 20% në bashkinë e Ramës, tek 20% në qeverinë e Ramës bashkë me ortakun italian me eksperiencë në të njëjtën fushë: korrupsionin. Sepse mbi të gjitha, arkitekti Casamonti njihet në Itali, siç raporton edhe gazeta italiane La Repubblica, si i dënuar për korrupsion për ndërtimet e tij në Firenze”, u shpreh zëdhënësja e PD.
Ajo theksoi se ‘për t’i hapur rrugën këtij projekti klientelist e korruptiv, Edi Rama ishte i detyruar të ndryshojë destinacionin e truallit, pasi kjo zonë mbrohej si terren sportive’.
“Ndaj, Edi Rama me vendim qeverie e ktheu në destinacion josportiv. Pas këtij akti, mbolli aty kulla e beton, dyqane e njësi tregtare, pa transparencë, në fshehtësi të plotë.
Ja ku është vendimi i qeverisë, që i hapi dyert kësaj afere korrupsioni”, u shpreh Zhupa.
PD tha se nga gjithë stadiumi, FSHF-ja do të ketë vetëm pak zyra.
“Arena e këtij biznesi, zmadhohet edhe më shumë kur del se Federata Shqiptare e Futbollit, do të ketë në pronësi vetëm fushën e futbollit, dhe 4 mijë metra katrorë për zyra. Të gjitha hapësirat e tjera të qendrës pseudostadium, dhe kulla do të jenë në pronësi të klientelës, kompanisë Alb-Stars shpk. Pra trualli publik, me vlerën më të madhe në qendër të Tiranës, i kalon për qëllime biznesi dhe përfitimi mikut të Edi Ramës”, deklaron PD.
Por sipas Zhupës, “nyjet gordiane të korrupsionit të Ramës dhe klientëve të tij të përhershëm do të priten shumë shpejt me votën e shqiptarëve”.
“Qytetarët dhe sportdashësit nuk mund të mashtrohen me gjoja interesa sportive. Partia Demokratike do jetë në mbrojtje të interesit publik, dhe sportit. Ne jemi për një stadium me fonde publike, dhe Partia Demokratike do të investojë për një impiant ku hapësira ti dedikohet qytetarëve dhe të ketë standarde olimpike moderne. Partia Demokratike i bën dhe një herë thirrje investitorëve se do të jetë në riskun e tyre personal hedhja e parave në këtë skemë korruptive të Edi Ramës, pasi ne do ta anulojmë atë”, theksoi zëdhënësja e PD.
VKM-ja e ndryshuar nga Edi Rama
ARTIKULLI I REPPUBLICA PËR ARKITEKTIN ITALIAN
http://firenze.repubblica.it/cronaca/2015/10/27/news/firenze_processo_castello_condannati_per_corruzione_salvatore_ligresti_e_gli_ex_assessori-126011953/?refresh_ce
