Nëna e Ermal Abdushi, futbollistit shqiptarë që u vra me një plumb në gojë në Itali, dhjetorin e kaluar nga një i afërm i tij, ka rrëfyer të gjithë historinë e saj të dhimbshme.
Vetëm sot ajo mund të shprehet e qetë pasi policia italiane ka arrestuar dhe dërguar në burg bashkëshortin e saj, i cili prej kohësh e përndiqte.
Nëna shqiptare ka rrëfyer dhimbjen e pafundme të humbjes së të birit dhe kërcënimeve nga i shoqi.
Ajo thotë për mediat lokale në Azate të Italisë se Policia nuk e besonte në fillim se përndiqej nga i shoqi.
Fillimisht, për shkak të konflikteve familjare, ai i kishte djegur automjetin dhe herë të tjera e kishte kërcënuar.
“Jeta ime ka ndryshuar përgjithmonë. Në dhjetor më vranë djalin, ndërsa pa e varrosur ende nisën konfliktet me bashkëshortin. Tani që ai është pas hekurave jam më e qetë”, tregon ajo.
Ermal Abdushi, 26-vjeçari u vra nga një i afërm i tij në shtëpinë e këtij të fundit. Ai u qëllua me një plumb në gojë.
Edhe pse autori ka thënë se vrasja ishte aksidentale, Policia ende heton për një ngjarje kriminale, pasi Abdushi dhe autori kanë qenë me precedentë penalë.
