Kreu i Departamentit të Rendit dhe Sigurisë në PD Enkeleid Alibeaj, dha sot një deklaratë të fortë për deputetin e PS-së, Pjerin Ndreu.
Alibeaj solli faktet se, mbrëmë, në një lokal në qendër të Fushë-Arrësit është festuar për nxjerrjen nga burgu të vëllait të kryetarit të Bashkisë së këtij qyteti, Fran Tuci. Sipas Alibeaj, Albert Tuci është liruar nga burgu nga deputeti i PS-së, Pjerin Ndreu. Për këtë të fundit, madje, janë ngritur dhe dolli.
Albert Tuci me precedent penal, i dënuar për trafik ndërkombëtar droge me 7 vite burg u arrestua nga forcat special në një aksion që u zhvillua rreth orës 19;00 të ditës së djeshme. Pak orë më pas ai u lirua, për shkak të ndërhyrjes së Pjerin Ndreut, u shpreh Alibeaj.
DEKLARATA E PLOTE E ENKELEJD ALIBEAJT
Pabarazia para ligjit dhe favorizimi i njerëzve të pushtetit. Deklaratë e kreut të Departamentit të Rendit dhe Sigurisë, Alibeaj
Një ngjarje e rëndë ka ndodhur mbrëmë, që tregon pabarazinë para ligjit, që tregon se nëse je i afërt me pushtetin ke lehtësi, favore dhe del menjëherë nga komisariati.
Dje rreth orës 19.00 në Fushë-Arrës, është ndaluar me forca operacionale, vëllai i kryetarit të Bashkisë, Albert Tuci, person me precedent penal, i dënuar për trafik ndërkombëtar droge me 7 vite burg.
Policia e Fushë-Arrësit nuk ka pasur dijeni, është shmangur nga ky aksion, për shkak të njohjeve dhe lidhjeve që i dyshuari ka në këtë Bashki.
Pasi është mbajtur disa orë më pas në komisariatin e Pukës, Tuci ka fituar lirinë, me ndërhyrjen e deputetit Pjerin Ndreu.
Dhe pas kësaj, një festë e madhe është zhvilluar në lokalin në qendër të Fushe-Arrësit, me dolli pa fund për deputetin Ndreu i cili i hoqi prangat të dyshuarit, vëllait të kryetarit të Bashkisë.
Partia Demokratike e konsideron këtë ndërhyrje të paligjshme të deputetit Ndreu, si dëshmi e dy standardeve, e favorizimit të njerëzve në pushtet.
Ligji nuk vepron ndaj mikut të deputetit, ndaj vëllait të kryetarit të Bashkisë.
Ky ndalim i ligjit para njerëzve të lidhur me pushtetin dhe me deputetët e Edi Ramës, është në fakt oligarkia.
Çdo qytetar pa njohje, pa lidhje, do të ishte mbajtur në burg e do të ishte dënuar, qoftë edhe për një tullë të vënë pa leje.
Ndërsa njeriu i deputetit të Ramës, edhe pse i dyshuar për vepra të rënda, edhe pse i ndaluar me forca speciale, fiton menjëherë lirinë pas ndërhyrjes së oligarkëve.
Partia Demokratike i kërkon prokurorisë të hetojë rastin, e të nxjerrë para përgjegjësisë deputetin e Edi Ramës dhe ata që urdhëruan lirimin e të dyshuarit, vëllait të kryetarit të Bashkisë së Fushe-Arrësit.
