Një i mitur pasi merrte bizhuteritë e mamit dhe motrës së tij, ja dorëzonte shokut të tij adult, 18 vjeçarit, për t`i shitur e më pas për të shkuar në plazh bashkë me të.
Sendet me vlerë vidheshin në shtëpi për t`u shituar në disa agjendari në Tiranë me arsyetimin se “u duheshin lekë për plazh”.
Paratë e përfituara janë shpenzuar prej tij, minorenit, nën 14 vjeç, në plazhin e Durrësit dhe për blerje të ndryshme. “Skema” ka funksionuar deri në momentin që i mituri H.V. është diktuar nga i ati i tij duke u përpjekur të merrte një varëse argjendi në shtëpi.
Rrëfimi para prindit, se byzylykët, unazat dhe varëset e floririt ia jepte shokut të tij disa vite më të madh, është pasuar me një kallëzim në polici për 18¬ vjeçarin. Gjykata e Tiranës përfundoi pak ditë më parë shqyrtimin e dosjes penale ku i pandehur ishte Jurgen V., duke e deklaruar të fajshëm për akuzën e “shtyrjes së të miturit në krim” dhe për “përvetësim të parave dhe mallrave që rrjedhin nga vepra penale ose veprimtaria kriminale”. Ai u dënua me 1 vit e 6 muaj burg, por nuk do të shkojë asnjë ditë në qeli, pasi gjykata vendosi lënien e tij në liri me kusht për një periudhë dyvjeçare. Sipas një akt-ekspertimi vlerësues të kryer gjatë hetimit të çështjes, ka rezultuar se vlera e sendeve të çmuara të marra në banesën e të miturit e më pas të shitura nga 18-¬vjeçari në argjendari të ndryshme, është 173.524 lekë të rinj.
Nga gjykimi rezultoi se i pandehuri Jurgen ka paraqitur kartën e tij të identitetit në dyqanet ku ka shitur objektet e çmuara, ku edhe ka nënshkruar në faturat përkatëse. MINORENI Në deklarimet e tij, i mituri H.V. ka pranuar se prej muajit qershor 2015, në disa raste kishte marrë në banesën e tij bizhuteri të ndryshme, që i përkisnin nënës dhe motrës së tij. Këto veprime ai i ka kryer në kohën që nuk ka pasur njeri në banesë. Sipas tij, pasi i ka marrë bizhuteritë, ia ka dhënë ato të pandehurit Jurgen V., shok i tij. I mituri ka shpjeguar se i pandehuri ia ka kërkuar një gjë të tillë në kohën kur kanë dashur të shkojnë në plazh e nuk kanë pasur lekë, prandaj edhe e kishte porositur që të mos i tregonte njeriu për këtë gjë. Minoreni ka rrëfyer edhe pikat se ku ishin dyqanet e floririt ku i pandehuri kishte shitur bizhuteritë e siguruara prej tij. Sipas H.V., nga shitja e sendeve me vlerë, i pandehuri Jurgen V. i ka dhënë atij vlerën prej 75.000 lekësh të rinj, lekë të cilat i kanë prishur së bashku.
