Partia Demokratike e ka cilësuar si emergjente largimin e Saimir Tahirit nga posti i Ministrit të Brendshëm. Në një dalje për mediat pas mbledhjes me dyer të mbyllura të grupit parlamentar demokrat, kreu i PD-së Lulzim Basha dha edhe arsyet.
“Jemi të bindur që Shqipëria e së nesërmes nuk mund të jetë kurrë Shqipëria e shullazëve, e qeverisë së bërë njësh me krimin. Që kjo të ndodhë Saimir Tahiri duhet të largohet njëherë e më parë.Kërcënimet e vazhdueshme ndaj gazetarëve, opozitës nga Shullazi dhe shullazët vazhdojnë edhe sepse protektori i tyre numër një vazhdon të mbajë detyrën e Ministrit të Brendshëm. Është emergjente largimi i Saimir Tahirit, njeriut botërisht të njohur me krimin.Që është përgjegjës për një fushatë të pesëfishimit të mbjelljes së kanabisit.”
Kryeopozitari Basha përshëndeti edhe njëherë arrestimin e Emiljano Shullazit, duke deklaruar se opozita do ta mbajë nën monitorim të plotë të gjithë proçesin gjyqësor. Ai shpresoi në një vëmendje të shtuar edhe të SHBA dhe BE.
“Me rastin e këtij operacioni të suksesshëm, kësaj pike kthese, ku të paktën në këtë fillim pushteti nuk ia ka dalë të ndihmojë lidhjet e tij kriminale. Shqiptarët po mësojnë disa të vërteta, sesi Emiljano Shullazi me mbështetjen dhe përkrahjen e lidhjeve të tij qeveritare është pasuruar në këto dy vite duke iu vënë pistoletën në kokë biznesmenëve, duke u thënë o gjobën, o jetën. Shullazi dhe shullazët në këto dy vite me mbështetjen qeveritare ia kanë dalë të përfitojnë shuma marramendëse, duke i vënë pronarët e bizneseve, qytetarët, pronarët e trojeve para zgjedhjes o vër firmën për tjetërsim të pronës, o prano diktatin e krimin me mbështetje qeveritare, ose jetën.
Shqiptarët kanë mësuar sesi Edi Rama dhe Saimir Tahiri kanë bërë atë që ka kërkuar dhe kërkon Emiljano Shullazi dhe banda e tij, në këmbim edhe Shullazi bën atë që i kërkon Edi Rama dhe Saimir Tahiri.Këto janë çështje që opozita i ka dënuar me forcë, por që shqiptarët kanë shansin ti shohin përmes një procesi gjyqësor që meriton dhe do të ketë vëmendjen e plotë të opozitës, uroj dhe të partnerëve ndërkombëtarë, SHBA dhë BE si provë që kjo pikë kthese në vigjilje të reformës në drejtësi do të jetë për gjithë shqiptarët shpresa që lidhjet e krimit me pushtetin dhe pushtetit me krimin nuk mund të jenë përherë mbi të drejtën dhe ligjin.”- u shpreh Basha
Sipas Bashës, kryeministri Rama dhe Ministri Tahiri janë në këmbë për të ndalur dhe sabotuar hetimet për çështjen, njëherazi dhe për ti mbyllur gojën Shullazit.
“Përpjekja për të ndalur dorën e drejtësisë vazhdon, Edi Rama dhe Saimir Tahiri janë në këmbë dhe po bëjnë gjithçka që Shullazi të mos thotë ato që di për këta të dy.Presioni ndihet kudo, është shtrirë dhe në media të cilat po ndërtojnë alibitë e biznesmenëve që po thonë se nuk ndodhen të kërcënuar. Shteti dhe media e kapur nga shteti janë në dispozicion të Shullazit. Edi Rama dhe Saimir Tahiri janë në zi dhe në këmbë për të ndalur, sabotuar këtë hetim. Është tronditëse, por nuk na habit.Ne si opozitë do të monitojmë deri në fund këtë proces, do u japim mbështetjen e plotë dhe të gjithanshme prokurorëve dhe gjyqtarëve me integritet për këtë rast.Ftojmë qytetarët trë vrasin frikën dhe të dalin me prova dhe fakte, dëshmitë mbi aktivitetyin e kësaj bande dhe bandave të tjera.”- shtoi më tej kryedemokrati.
Shefi i opozitës solli në vëmendje edhe rastin e denoncuar sot nga PD, lirimin e vëllait të kryebashkiakut të Fushë Arrëzit pas ndërhyrjes së deputetit Ndreu.
