Ka ndërruar jetë në Spitalin e Traumës efektivi i Policisë së Rendit në Komisariatin e Mirditës, Dritan Mjeshtri, i cili u aksidentua tri ditë më parë gjatë shërbimit në afërsi të Rubikut.
40-vjeçari Mjeshtri nuk mundi që t’u mbijetojë plagëve të marra nga aksidenti, duke gjetur vdekjen paraditen e së dielës. Aksidenti i rëndë u shënua mesnatën e së enjtes, në Rrugën e Kombit, në afërsi të Rubikut.
Në këtë aksident u përfshinë tre mjete, teksa njëri prej tyre ka goditur makinën e parkuar private të efektivit të policisë, i cili ishte në patrullim në Rrugën e Kombit.
Në momentin e aksidentit efektivi i policisë ka qenë brenda mjetit, ku për shkak të goditjes së fortë ai mbeti i plagosur rëndë. Menjëherë në ndihmë të tij kanë ardhur koleget, të cilët ishin në postbllok vetëm pak metra larg vendit të ngjarjes.
Ata e kanë dërguar në spital efektivin e policisë, për t’i dhënë ndihmën e parë, por gjendja e tij shëndetësore ka qenë shumë e rëndë. Aksidenti, i cili i mori jetën 40-vjeçarit, është denoncuar një ditë më vonë edhe nga deputetja e Partisë Demokratike në Mirditë, Albina Deda.
Në një status të saj në rrjetin social, Deda është shprehur se mjeti ku ishte efektivi i policisë është përplasur nga një inspektor i Bashkisë së Mirditës, i cili ka qenë në gjendje të dehur. Sipas Dedës, Fatjon Lleshaj, pas aksidentit, është larguar nga vendi i ngjarjes, ndërsa policia e ka mbajtur të fshehur ngjarjen.
Por ndonëse kanë kaluar tri ditë nga ngjarja, policia nuk ka shpërndarë asnjë komunikatë për mediat. Me gjithë insistimin e vazhdueshëm të medias, drejtuesit e policisë e kanë kaluar në heshtje, duke deklaruar se efektivi i policisë është plagosur lehtë dhe pasi ka marrë ndihmën mjekësore në spital, është rikthyer në shtëpi.
Nga ana tjetër, nga informacionet e marra është bërë e ditur se shkak për aksidentin është bërë një parakalim i gabuar i mjetit që drejtohej nga inspektori i Bashkisë Mirditë, Fatjon Lleshaj. Ky i fundit mësohet se po lëvizte me shpejtësi me automjetin e tij në afërsi të postbllokut të policisë, duke bërë që të humbë kontrollin e mjetit dhe të përplaset me makinën ku ishte efektivi i policisë dhe me një tjetër automjet. Pas aksidentit, ai është larguar nga vendi i ngjarjes për t’u dorëzuar në Policinë e Mirditës vetëm një ditë më vonë. /Panorama/
