Zikaltrit e Atalanta-s i kanë bërë një dhuratë të madhe zikaltërve të Inter, duke barazuar 3-3 me Roma-n. Skuadra e Mancini-t tani është futur zyrtarisht në garë për të siguruar kualifikimin në Champions League për sezonin e ardhshëm. Falë fitores së djeshme kundër Napoli-t dhe ndalesës së sotme të verdhekuqve, milanezët janë vetëm katër pikë larg vendit të tretë në kampionat kur kanë mbetur vetëm pesë ndeshje nga fundi i Serisë A.
Roma, që nuk humbet në kampionat prej 12 ndeshjesh, ka shpërdoruar një avantazh të dyfishtë të siguruar në harkun e katër minutave në pjesën e parë. Në minutën e 23-të ka qenë Digne që ka zhbllokuar takimin, teksa Nainggolan ka çuar shifrat në 2-0 në minutën e 27-të. Vendasit, të cilët janë në luftë për mbijetesë, kanë reaguar në minutën e 33-të duke ngushtuar diferencat me D’Alessandro, para se të përmbysnin gjithçka me ish-sulmuesin e Milan, Marco Borriello, i cili ka realizuar dy herë në minutat 37 dhe 50.
Në minutën e 78-të trajneri i Roma-s Spalletti ka futur në fushën e lojës kapitenin Francesco Totti, i cili e ka shpërblyer pesë minuta para fundit të ndeshjes duke realizuar golin e barazimit. Një minutë më pas ka qenë Dzeko që ka pasur një rast të pastër për t’i dhuruar fitoren miqve, por goditja e tij ka qenë e gabuar, teksa sulmuesi boshnjak ka pretenduar një penallti, por arbitri Irrati ka lejuar vazhdimin e lojës. Në fund sfida është mbyllur në barazim, me Atalanta-n që ka bërë një hap më shumë drejt mbijetesës, ndërsa verdhekuqtë kanë shpërdoruar një mundësi për të shkuar tri pikë larg vendit të dytë që mbahet nga Napoli dhe tani duhet të ruhen nga Inter, që mban vendin e katërt.
Atalanta – Roma 3-3
Shënues: D’Alessandro 33’, Borriello 37’, 50/ Digne 23’, Nainggolan 27’, Totti 85’
Atalanta: Sportiello, Masiello, Toloi, Paletta, Drame, Kurtic, Migliaccio, Freuler, D’Alessandro (Raimondi 75’), Borriello (Pinilla 84’), Gomez (Brivio 91’). Trajner: Reja. R
oma: Szczesny, Rudiger, Manolas, Zukanovic (El Shaarawy 54’), Digne (Emerson 34’), Florenzi, De Rossi (Totti 78’), Nainggolan, Salah, Dzeko, Perotti. Trajner: Spalletti.
Gjyqtar: Irrati
Kartonë të verdhë: Borriello, Migliaccio, Raimondi, Kurtic/Zukanovic, De Rossi, Manolas
