Një lëndë eksplozivi ka shpërthyer në Kombinat në orët e para të mëngjesit të djeshëm, në makinën e një emigranti të sapokthyer nga Italia.
Sipas policisë, ngjarja ka ndodhur rreth orës 00:20, në rrugën “Llambi Bonata”, në garazhin e banesës së shtetasit me iniciale G.Sh., 37 vjeç, banues në Itali.
Tritoli ishte vendosur poshtë derës së pasme të pasagjerit dhe si pasojë e shpërthimit ka pasur dëme të vogla materiale të pjesëve plastike të derës së pasme të pasagjerit dhe të shasisë së automjeti tip “Audi”.
Lidhur me shkaqet e kësaj ngjarje, policia po heton në dy pista. Motivi i ngjarjes dyshohet të jetë një lidhje e prishur dashurie mes emigrantit dhe një vajze banuese në zonë.
Ajo mësohet se ka një parukeri në zonën ku ndodhi ngjarja, e cila është shoqëruar nga policia. Gjatë marrjes në pyetje, ajo mohoi të ketë gisht në ngjarje dhe më pas u la e lirë.
Pista e dytë e hetimeve ka të bëjë me konflikte të mundshme të pronarit të makinës që iu vendos tritol. Nga shpërthimi, pati dëme të vogla materiale. Nisur nga sasia e vogël, dyshimet janë se shpërthimi mund të ketë qënë një paralajmërim.
