Gjykata e Tiranës i ka kërkuar reperit kosovar, Ylber Abdullahu, i njohur me emrin e artit Cozman, që të heqë dorë nga përdorimi i lëndës narkotike. Ai u kap më 4 korrik të vitit të kaluar me disa qese hashash në makinë, bashkë me këngëtaren Tuna. Kjo e fundit u lirua, pasi Cozman mori përgjegjësinë, ndërsa çështja shkoi në Gjykatën e Tiranës. Kolegji penal, i kryesuar nga Martin Deda, e dënoi me kusht këngëtarin.
Ndërkohë, prokuroria kërkoi për Ylber Abdullahun dënimin me 6 vjet burg. Për lëndën narkotike, e llojit Cannabis Sativa me peshë 18 gramë, të asgjësohet, pasi qarkullimi i tyre është i ndaluar. Mbrojtja kërkoi pezullimin e vendimit me burg.
Ndërkohë, gjykata vendosi “deklarimin fajtor të Cozman, për prodhim dhe shitje të lëndëve narkotikeve dhe e dënon me 5 vjet burgim. Por n zbatim të gjykimit të shkurtuar, gjykata e dënon Cozman përfundimisht me 3 vjet e 4 muaj burgim. “Në aplikim të nenit 59 të Kodit Penal urdhërohet pezullimi i ekzekutimit të vendimit të dënimit me burgim për një afat 3 vjet, në mënyrë që gjatë kësaj kohe i pandehuri të mos kryejë vepër penale. I dënuari duhet që të mos shoqërohet me persona të dënuar” thuhet në vendimin e gjykatës.
Por, gjyqtari Martin Deda i kërkoi reperit që “të heq dorë nga përdorimi i lëndëve narkotike”. Gjykata vendosi edhe revokimin për caktimin e masës së sigurimit garanci pasurore në shumën 5000 euro dhe kthimin e shumës personit që e ka depozituar për llogari të vendimit të Gjykatës së Tiranës. Gjykata i ngarkoi Cozman-it edhe pagimin e shumës prej 11000 lekë.
Gjatë shqyrtimit gjyqësor, Ylber Abdullahu, ka pranuar akuzën e posedimit të lëndëve narkotike. Para gjyqtarit Martin Deda, këngëtari pranoi akuzën e prodhimit dhe mbajtjes së hashashit, ndërsa tha se është penduar për këtë krim. Prokuroria lexoi në gjykatë në mënyrë kronologjike ngjarjen e datës 4 korrik të 2015-s.
Në këtë kohë, Cozman dhe shoqëruesja e tij, Altuna Sejdiu, e njohur si Tuna, u ndaluan nga policia. Sipas akuzës, të dy së bashku po udhëtonin me mjetin “Range Rover”, kur janë ndaluar nga forcat e rendit për verifikim dokumentesh. Gjatë kontrollit, policia konstatoi tym hashashi. Policia gjeti dhe sekuestroi një sasi prej 20 gram kanabis sativa që Cozman pretendoi se e kishte për përdorim vetjak.
Disa orë pas shoqërimit, këngëtarja Altuna Sejdiu u lirua, ndërsa Cozman u lirua 48 orë më pas nga Gjykata e Tiranës, pasi familja dorëzoi në formë garancie një shumë prej 5 mijë eurosh. Bashkë me të pandehurin Cozman, në gjykatë po gjykohen edhe shitësit e hashashit, të pandehurit Andi, Ilirjan, Vladimir dhe Marsel Xeba, Skerdi Xheli dhe Xhuljo Qejvanaj, emrat e të cilëve u zbuluan nga hetimet e prokurorisë e policisë. Seanca gjyqësore u shty për me datën 15 mars, ditë edhe kur gjykata do të dëgjojë pretencën e prokurorit, pretendimet e mbrojtjes dhe më pas të shprehet me vendim.
(Boldnews)
