Policia e Durrësit ka arrestuar një 38-vjeçar pasi u kap duke transportuar me furgon nxënës shkolle jashtë kapaciteteve të mjetit të tij.
Blutë e Durrësit sqarojnë se Klodian Llaftiu fillimisht, nuk i është bindur urdhërit të policisë për të ndaluar, por më pas është bërë i mundur ndalimi dhe gjatë kontrollit, rezultoi se Llaftiu nuk kishte edhe leje drejtimi të mjetit.
Njoftimi i policisë
Specialistët e Sektorit të Policisë Rrugore në Drejtorinë Vendore të Policisë Durrës, më datë 13.04.2016, kanë arrestuar në flagrancë shtetasin:
Klodian Llaftiu, 38 vjeç, banues në Durrës, pasi:
Në lagjen Nr. 1, Durrës, nuk i është bindur urdhërit të punonjësit të policisë rrugore për të ndaluar automjetin tip Benz furgon me targa AA 685 MM, i cili transportonte nxënës shkolle jashtë kapacitetit, duke i mbajtur edhe në bagazhin e mjetit.
Llaftiu, ka tentuar të largohet në momentin që është ndaluar nga Sherbimet e Policisë, por është kapur menjëherë nga uniformat blu.
Gjithashtu, gjatë kontrollit të dokumentacionit ka rezultuar se nuk dispononte leje drejtimi.Materialet i kaluan Prokurorisë së Rrethit Gjyqësor Durrës për veprime të mëtejshme për veprat penale ” Drejtimi i automjeteve në mënyrë të parregullt ” dhe ”Mosbindja ndaj urdhërit të punonjësit të policisë të rendit publik” parashikuar në nenet 291 dhe 242 të Kodit Penal.
