Dy shoqe, njëra prej tyre shqiptare, të moshave nga 13 vjeç, janë zhdukur duke mos lënë asnjë gjurmë teksa po prisnin autobusin.
Ngjarja ka ndodhur në Itali, ku minorenet pas mbarimit të orarit të shkollës ishin drejtuar stacionit të autobusit për të shkuar në shtëpi.
Mediat italiane bëjnë me dije se shqiptarja ishte në shoqërinë e shoqes rumune kur humbën gjurmët dy ditë më parë dhe familjet e tyre janë në dëshpërim se nuk po i gjejnë dot. Për herë të fundit vajzat, (ato që shihni në foton më poshtë) janë parë në zonën e Trevisos në Itali, teksa ishin duke pritur autobusin në stacion për të udhëtuar drejt Castelfranci Veneto.
Vajzat quhen Selma dhe Roxana, kjo e fundit nga Rumania. Mësohet se familjet e tyre kishin vite që ishin vendosur në Itali dhe ishin integruar mirë me jetesën atje. Policia ka nisur hetimet për gjetjen e tyre. Mediat italiane nuk e përjashtojnë as mundësinë që largimi i tyre të jetë vullnetar, dhe të mos kemi të bëjmë me një rrëmbim.
