Kreu i Bashkisë së Këlcyrës, Klement Ndoni ka reaguar pas publikimit të videos ku një ish-i dënuar e akuzonte për trafik droge. Madje personi në fjalë, Bardhi Nunellari deklaronte se ai kishte bërë 12 vite burg për trafik droge, të cilin e bënte për llogari të Ndonit. Por nga ana tjetër, kreu i Bashkisë Këlcyrë deklaron se nuk ka pasur dhe nuk ka asnjë lidhje me Bardhi Nunollarin dhe se ai ka qenë pjesë e stafit të kundërshtarit të tij politik në fushatën për zgjedhjet lokale, duke bërë përgjegjës ish-kandidatin demokrat Bujar Fezga.
“Në disa portale online, po qarkullon një video e një ish-të dënuari për trafik droge, pjesë e stafit elektoral të kundërshtarit tim në fushatën e fundit elektorale Bujar Fezga, i mbështetur nga Partia Demokratike.
Personi që flet në video, nuk ka asnjë njohje dhe lidhje personale me mua dhe nuk kam pasur kurrë asnjë kontakt me të.
Ai është viktimë e dëshpërimit që ka kapur opozitën dhe ish-kandidatin e saj në Bashkinë e Këlcyrës, pas zgjedhjeve të fundit dhe po përdoret prej tyre.
Sot kam nisur procedurën për të paditur penalisht për shpifje të qëllimshme personin e përdorur politikisht dhe do t’i shkoj deri në fund padronit të tij, i cili pasi provoi të fitonte me pare, me përçarje fetare dhe me dhunë, tani shpreson të hedh baltë duke përdorur njerëz të dëshpëruar, të cilët fatkeqësisht janë miqtë dhe bashkëpunëtorët e tij, në fushatën e fundit elektorale”, deklaron Ndoni.
Rrëfimi: Trafikova 1 ton drogë me kreun e bashkisë Këlcyrë, unë u dënova, ai jo (VIDEO)
