Banka Botërore vë në dukje pesë rreziqe që kanosin procesin e rimëkëmbjes ekonomike të Shqipërisë. Raporti i fundit i bankës pasqyron pritshmëritë për periudhën 2016-2017.
Faktoret e brendshëm, që mund të cënojnë një zhvillim të qëndrueshëm janë dy sipas Bankës.
Zgjedhjet parlamentare të vitit të ardhshëm dhe një ngadalësim i mundshëm i reformave strukturore e fiskale.
Ndaj qeverisë i kërkohet të pershpejtojë reformat e nisura. Institucioni Financiar Ndërkombëtar rekomandon se reformat duhet të përqendrohen në përmirësimin e klimës së biznesit dhe qeverisjes.
Vendimet e drejta nga gjyqësori si dhe shërbimet publike eficiente e cilësore, janë të domosdoshme sipas Bankës.
Por pjesa më e madhe e rreziqëve lidhet me tregjet e huaja. Pikëpyetjet janë ngritur shumë mbi luhatshëmërinë e tregjeve financiare, çmimet e ulëta në bursë për lëndët e para dhe rritja e ulet ekonomike e vendeve eksportuese.
Për ekonominë tonë, objektiv sipas bankës duhet të jetë rritja e produktivitetit.
Një përdorim më i mirë e i qëndrueshëm i energjisë e burimeve natyrore, janë njëra anë. Banka kërkon gjithashtu që të formalizohet punësimi.
Të premten, drejtuesit e bankës botërore në vendin tonë, vunë në dukje se shqipëria ka borxhin më të lartë publik në rajon, dhe rritja e ekonomisë nuk është reflektuar mjaftueshëm tek qytetaret.
Ekspertët e Bankës vlerësuan se Shqipëria është e fundit në dinamiken e saj për të ulur varfërinë krahasuar me vendet e Tjera në Europën Juglindore./ABC News
