Në analizën vjetore të Gjykatës së Tiranës, MInistri i Drejtësisë, Ylli Manjani, nuk ka kursyer kritikat e tij ndaj orareve që nuk respektohen nga gjykatësit duke sjellë dhe një rast konkret.
“Një gjyqëtare preferonte të bënte muhabet në vend që të ishte e pranishme në një trupë gjykuese”, është shprehur Ministri Manjani. Në këtë rast konkret dy ekspertë të tij kanë rastisur një ditë në gjykatë dhe kanë parë një gjyqtare e cila bënte muhabet në korridor dhe pikërisht në atë moment duhet të ishte e pranishme në një trupë gjykuese.
Gjyqësori, theksoi ministri i Drejtësisë, duhet të lejojë përmbarimin të ekzekutojë vendimin dhe jo t’i bllokojë me procedura.
“Një tjetër fakt që dua të theksoj është se duhet të respektohen oraret e gjykimit. Apeli është gjykata që bën realisht balancën, që anon gurin e balancës nga e mira apo e keqja me shumë shpejtësi. Nëse në Apel ne do të arrijmë të gjykojmë me shpejtësi, atëherë perceptimi do të ndryshojë. Çdo vonesë shton perceptimin për të keqen. Askush nuk do t’ia dijë që gjyqtarët janë të ngarkuar, edhe pse realisht ata kanë nga shumë çështje. Mesazhi që prona nuk po shkon te i zoti, por tek më i zoti, është një histori e vjetër, por gjykata ka një rol që lidhet me pjesën infrastrukturore të kësaj historie. Ky është një debat i vjetër, por nuk mund të endet pafundësisht si histori ekspertësh, hartash, dokumentesh, etj. Gjykatat kanë tendencën të anashkalojnë listën e ekspertëve të licencuar nga shteti”, tha ministri. Manjani tha se do t’i propozojë Këshillit të Ministrave një paketë ligjore për çështjen e përmbarimit. “Kush ka marrë kredi duhet ta kthejë mbrapsht kokërr me kokërr. Marrëveshja për kredi është titull ekzekutiv dhe unë nuk e di se për çfarë hyn gjykata këtu”.
