Parlamenti nuk do të mblidhet më gjatë ditës së sotme, pavarësisht se u ndërpre për 30 minuta pushim. Kjo pasi, Byroja e Kuvendit e cila u mblodh për të shqyrtuar kërkesat e PD-PS për incidentin në seancë nuk ka marrë ende një vendim.
Partia Demokratike kërkoi përjashtimin e deputetit Erion Braçe për shkak të fjalorit të përdorur në seancë. Ndërkaq edhe Partia Socialiste ka kërkuar përjashtimin e 4 deputetëve të opozitës: Sali Berisha, Arben Ristani, Edi Paloka dhe Roland Keta. Por Byroja nuk ka marrë vendim duke kërkuar kohë për shqyrtimin e kërkesave.
Në përfundim të mbledhjes së Byrosë nënkryetari i Byrosë, deputeti demokrat Edmond Spaho tha se nuk do të merrte më pjesë në mbledhjet e këtij organi pasi maxhoranca ka standarde të dyfishta. Ai tha se PD kërkoi përjashtimin me 10 ditë të deputetit Braçe, por maxhoranca kërkoi kohë në mënyrë që sipas tij, kjo çështje të harrohet.
Ndërkohë seanca e radhës do të jetë pas një vendimi të Byrosë.
