Një shumë prej 1 milionë e 288 mijë dollarë do t’i japë shteti shqiptar shoqërisë “Valio Shipping Company”.
Vendimi vjen për zbatimin e vendimit të Gjykatës Evropiane të të Drejtave të Njeriut, i marrë më 6 tetor të vitit 2015. Pagesa do të kryhet në lekë në bazë të kursit të këmbimit, ndërsa do të jetë Ministria e Financave ajo që do të zbatojë këtë vendim.
“Pagesa e shumës së depozituar në favor të “Valio Shipping Company”, të bëhet nga Ministria e Financave, pas paraqitjes së dokumentacionit ligjor të nevojshëm për kryerjen e pagesave nga buxheti i shtetit, brenda një afati 3-mujor nga data që vendimi është bërë përfundimtar, data 6.10.2015”, thuhet në pikën 4 të vendimit e Këshillit të Ministrave.
Sipas vendimit të Gjykatës së Strasburgut, nëse shuma nuk shlyhet brenda tre muajve, atëherë qeveria do të duhet të paguaj kamatëvonesë të barabarta me kursin marzhinal të huas së Bankës Qendrore Evropiane, për periudhën e mospagimit, plus tre për qind.
Shuma në fjalë do të përballohet nga fondi i kontingjencës i buxhetit të shtetit.
