Dëshmitari i ngjarjes së tragjedisë së rrëzimit të avionit u bë njëkohësisht dhe heroi i pilotit që mbijetoi ditën e sotme në Shkodër. Skënder Cenaj rrëfen se si u rrëzua avioni dhe si ai bashkë me shokun e tij shpëtuan Gerald Baramuçaj, pilotin e plagosur.
Ai rendi menjëherë drejt liqenit kur sapo pa helikopterin që të rrëzohej. Cenaj thotë për “Panorama Online” se fillimisht u fut me not duke kërkuar të mbijetuar. “Isha rreth liqenit, po bëhesha gati për të peshkuar kur pashë helikopterin që u rrëzua në liqen. Menjëherë u futa me not, pasi lajmërova një shokun tim që erdhi me varkë. Aty gjeta një nga pilotët të plagosur, Gerald Baramuçaj.
Ai kishte vrarë njërën shpatull, siç duket i kishte dalë vendin. E ndihmuan të diltë nga helikopteri, e hypëm në varkë dhe më pas e dërguam drejt e në breg. Lajmëruam ambulancën dhe e çuam në spital. Për dy të tjerët nuk di gjë, por ai nuk dukej shumë keq”, rrëfen dëshmitari.
Ndërkohë, burime nga Policia e Shkodrës thonë se janë gjetur edhe dy trupat e pilotëve të mbetur të vdekur dhe janë nisur për në morg. Tashmë pritet që të nxirret edhe helikopteri për të mësuar shkaqet e rrëzimit. Nga ana tjetër, piloti i mbijetuar duket se është jashtë rrezikut për jetën.
