Shqipëria do të ketë një ligj që të detyrojë të gjitha kompanitë e huaja që duan të investojnë në vend, të bëjnë publike listën e aksionerëve.
Është Ministria e Drejtësisë që po përgatit këtë ligj. Këtë fakt e deklaroi sot ministri Ylli Manjani, i cili tha se do të ndiqet modeli gjerman, që po përgatit aktualisht draftin.
“Ekspertët e ministrisë së drejtësisë po shohin mundësinë që çdo kompani e huaj që investon në Shqipëri të deklarojë aksionerët. Do bashkëpunojmë edhe me autoritetet gjermane për këtë çështje. Është shqetësues raporti i komisioneres për konkurrencën e cila nuk ka pasur mundësi të investigonte. Unë po flas për mundësinë që çdo institucion të investigojë. Nuk është koha për të folur për privatësi për këtë çështje, por për të folur për transparencë”, tha Manjani.
Ministri theksoi se çdo kompani që është regjistruar në off shore që do të investojë në Shqipëri, duhet të tregojë kush janë aksionerët.
Manjani tha se nuk ka informacion për emra shqiptarësh por është shprehur i gatshëm të ndihmojë autoritetet.
“Nuk kam informacion për emra shqiptarë. Detyra jonë të ndihmojmë autoritete me letër porosi. Sa të kemi kërkesa do reagojmë”, tha ai.
Përsa i përket çështjes së kompanisë së markimit të karburanteve, GFI, Manjani tha se është shqetësuar nga deklarata e Kryetarja e Autoritetit të Konkurrencës, ndaj ka kërkuar ndërhyrje në ligj.
“Më shqetësoi shumë deklarata e zonjës Lati ndaj kërkova ndërhyrje në ligj. Duhet të kontribuojmë me ligje sa më transparente”, tha Manjani.
