Policia e Durrësit ka dhënë detaje të reja në lidhje me vrasjen e ish-kryeplakut në Manëz të Durrësit. Dyshohet se krimi është bërë nga një familjare i tij, por hetuesit ende nuk kanë prova për arrestimit të autorit të dyshuar.
18 ditë nga krimi ndaj Mirosh Djaloshit, ekspertët kanë ngushtuar rrethin e të dyshuarve si autorë. Grupi hetimor rrëzoi pistën e konfliktit me të tjerë persona apo vrasjen për shkak të grabitjes. Dhe po ngre dyshime se autori mbetet njëri prej familjarëve të viktimës.
Këto pretendime të hetuesve vijnë pas zbulimit të konflikteve të vazhdueshme mes viktimës me të afërmit e tij për shkak të alkoolit. Por hetuesit kanë në dorë edhe deklaratat kontradiktore të bërë nga bashkëshortja dhe djali i viktimës për vendndodhjen e tij pak orë para krimit.
Në këto rrethana investigimi vëmendja kryesore e grupit hetimor është përqendruar tek konflikti në familje, duke përforcuar dyshimet, por pa mundur të sigurojnë prova të mjaftueshme për prangosjen e autorit mes tyre.
Trupi i pajetë i Mirosh Djaloshit u gjet në orët e para të mëngjesit të së premtes të 18 marsit, në rrugicën e oborrit të banesës. Policia konstatoi se 54-vjeçari ishte goditur disa herë me çekiç pas koke, duke i shkaktuar vdekjen e menjëhershme.
