Një ditë pasi presidenti Nishani rrëzoi ligjin për kamerat e sigurisë, Ministri i Brendshëm, Saimir Tahiri në një deklaratë nga Lezha ka thënë se do të merret në konsiderat sugjerimi i presidentit.
Duke shtuar më tej se nëse ka vend për reflektim do e shqyrtojë projektligjin për kamerat e sigurisë. Edhe pse ka vlerësuar kundërshinë e presidentit në lidhje me projekt ligjin e kamerave të sigurisë, ai ka thënë se i duket absurd në qoftë se e krahason konceptin me vendet e tjera të botës.
‘Mua ma do mendja dhe në Lezhë, në qoftë se qytetarët e Lezhës do dinin që në shkolla ka kamera sigurie, apo elementë të tjerë siguri, unë besoj prindërit do të ndiheshin më të sigurtë për fëmijët e tyre. E njëjta gjë vlen edhe për të gjitha masat shtesë që janë propozuar në projektligj, por, e përsëris, ne do ta vlerësojmë me seriozitet mendimin e Presidentit dhe shumë shpejt do të bëhen publike dhe për ju rezultatet e konsultimit që do bëjmë për të marrë parasysh në qoftë se ka për të marrë parasysh, ato që ka parashtruar Presidenti’’ tha ministri Tahiri.
Sipas Tahirit, bashkë me eskpertët po pret sugjerimet e Presidentit. “Presidenti ka ushtruar të drejtën e tij kushtetuese. Ka shfaqur edhe disa rezerva të cilat kam shumë besim që, bashkë me Komisionet në Parlament do t’i shohim. Nëse ka diçka për të reflektuar do e reflektojmë. Në të kundërt, do të vazhdojmë me projektin që kemi nisur dhe që u miratua në Parlament. Ne jemi shumë të hapur që çdo sugjerim të Presidentit të Republikës ta marrim parasysh, në eventualitetin që ata janë të arsyeshme dhe ligjore. Dhe mezi pres të lexoj, bashkë me ekspertët e ministrisë por dhe me kolegët deputetë në Komision, të lexojmë sugjerimet e Presidentit për të parë çdo mundësi që të përmirësojmë projektligjin që kemi paraqitur në Parlament. Ne mendojmë se Ligji për Sigurinë Publike shton shumë kapacitetin e Policisë së Shtetit (më së pari) dhe pastaj të gjithë institucioneve të tjera për të bërë Shqipërinë më të sigurtë’’ tha ministri Tahiri.
