Antonio Conte ka firmosur dje kontratën 3-vjeçare me Chelsea. Megjithatë, 45-vjeçari ka thënë se do të flasë si trajner i bluve të Londrës vetëm pasi të mbyllë angazhimin që ka me kombëtaren italiane, finalet e “Euro 2016”. Në këto kushte, “pista” është lënë për mediat, sidomos ato britanike, që kanë nisur gjurmimin dhe shpalosin arritjet e teknikut italian. Një nga krahasimet është ai mes tij dhe Mourinhos, referuar ecurisë së të dyve në Seria A.
Abramovich shkarkoi në janar Mourinhon dhe dje zyrtarizoi si trajner të Chelsea italianin Antonio Conte Duke qenë se Conte pason portugezin e shkarkuar në “Stamford Bridge”, sepse holandezi Gus Hidink ishte një zgjedhje emergjence, mediat britanike raportojnë për ato që ka arritur njëri në stolin e Juventusit dhe tjetri në stolin e Interit. Më konkretisht, rekordet e të dyve në Seria A, ku Conte del më produktiv.
Duke qenë se numri i ndeshjeve që ka drejtuar secili, në stolat e skuadrave respektive, është i ndryshëm, krahasimi është fokusuar te fitoret në përqindje, në pikët për ndeshje dhe titujt e fituar. Mourinho konsiderohet hero në “San Siro”, për ato që arriti në drejtimin e Interit Kështu, Conte e ka drejtuar Juventusin në 127 ndeshje, ndërsa Mourinho ka qenë trajner i Interit në 76 ndeshje. Numri i fitoreve, në përqindje, flet në favor të 45-vjeçarit italian, në masën 68 %, përkundrejt 65 % të portugezit në stolin zikaltër. Pikët për ndeshje, një tjetër komponent i krahasimit që u bëhet të dyve, është thuajse i barabartë. Conte ka fituar 2.3 pikë për ndeshje me bardhezinjtë e Torinos, ndërsa Mourinho 2.2 pikë me zikaltrit e Milanos.
Antonio Conte ka fituar tre kampionate radhazi me Juventusin Trajneri në ardhje i Chelsea ka fituar 3 tituj me Juven, në Seria A, ndërsa trajneri i larguar që në janar ka fituar 2 tituj me Interin. Pra, nëse i referohesh këtij krahasimi, ku emërues i përbashkët është Seria A, një nga ligat e vështira europiane, për shumë arsye, pritet që Conte të jetë më i suksesshëm se “Special One” në krye të Chelsea. Sidoqoftë, koha do ta tregojë…
