Bayern Munich ka regjistruar fitoren e tretë radhazi në kampionatin gjerman, pasi ka mundur sot ekipin e Eintracht Frankfurt me rezultatin e ngushtë 1-0. Një rezultat i gënjeshtërt, duke parë se ndeshja është dominuar nga ekipi vendas, që ka krijuar shumë raste për gol.
Në fund, takimi është vendosur nga goli i mrekullueshëm i francezit Franck Ribery. Në minutën e 20-të Mario Gotze, në fushë që nga minuta e parë, ka goditur portën nga jashtë zonës, por goditja e tij është pritur nga portieri i miqve, me topin që ka shkuar drejt francezit, i cili ka goditur menjëherë portën me rroveshatë, duke i dhuruar avantazhin dhe fitoren ekipit të Guardiola-s.
Dominimi i vendasve ka vazhduar edhe në pjesën e dytë, por goli ka munguar. Frankfurt, që mban vendin e parafundit në renditje në kuotën e 27 pikëve, nuk ka shqetësuar në asnjë momentin portierin Neuer. Kjo ka qenë fitorja e 23-të në këtë sezon të Bundelisgës për Bayern, që tani ka një avantazh prej tetë pikësh ndaj skuadrës së vendit të dytë, Borussia Dortmund, që do të luajë në orën 18:30 në shtëpi kundër Werder Bremen, me synimin për të mbajtur hapur luftën për titull në kampionat.
Në ndeshjet e tjera të javës së 28-të të Bundesligës, Ingolstadt ka marrë fitoren e parë në pesë ndeshjet e fundit të kampionatit, duke mundur në shtëpi skuadrën e Schalke me rezultatin 3-0. Mainz ka fituar 4-2 me Augsburg, teksa Hamburg ka mposhtur në transfertë, me rezultatin 3-0, ekipin e Hannover, që mban vendin e fundit në kampionat në kuotën e 17 pikëve. Në fund, ndeshja mes Darmstadt dhe Stuttgart është mbyllur në barazim 2-2.
Bayern Munich-Frankfurt 1-0
Shënues: Ribery 20’
Bayern Munich: Neuer, Lahm, Martinez, Alaba, Bernat, Alonso, Muller, Gotze (Vidal 85’), Thiago, Ribery, Lewandowski (Costa 71’). Trajner: Guardiola.
Frankfurt: Hradecky, Chandler, Zambrano, Abraham, Oczipka, Djakpa, Aigner, Hasebe, Huszti (Stendera 48’), Ben-Hatira (Kittel 64’), Seferovic (Castaignos 58’). Trajner: Kovac.
Gjyqtar: Meyer
Kartonë të verdhë: Lewandoeski, Gotze/Abraham, Ben Hatira, Chandler, Stendera
DENONCO