25 minuta lojë i kanë mjaftuar brazilianit Alexandre Pato për të realizuar golin e tij të parë me skuadrën e Chelsea, që ka mundur me rezultatin e thellë 4-0 ekipin e Aston Villa, që mban vendin e fundit në renditjen e kampionatin anglez. Braziliani, i cili është huazuar nga “Blutë” në merkaton e janarit, ka bërë debutimin e tij në Premier League në minutën e 23-të të pjesës së parë kur ka marrë vendin e francezit Remy, i cili është larguar nga fusha për shkak dëmtimi.
Në minutën e tretë shtesë ish-sulmuesi i Milan ka dyfishuar avantazhin e miqve nga pika e bardhë e penalltisë. Penallti që është fituar nga vetë sulmuesi. Aston Villa – Chelsea Live Score Para këtij momenti, ka qenë 20-vjeçari Loftus-Cheek që ka kaluar në avantazh londinezët, i ndihmuar edhe nga një devijim i topit nga një mbrojtës i Aston Villa. Në pjesën e dytë protagonisti i ndeshjes ka qenë spanjolli Pedro, i cili ka trefishuar avantazhin e miqve në minutën e 46-të, pas një asisti të brazilianit Oscar, dhe ka realizuar pokerin për Chelsea në minutën e 59-të.
Ky rezultat ka mbetur i pandryshuar deri në fundin e ndeshjes me “Blutë” që janë ngjitur në kuotën e 44 pikëve në kampionat, gjashtë pikë larg Europa League dhe shtatë larg zonës Champions. Ndërkohë, trajneri holandez Guus Hiddink vazhdon të jetë i pamposhtur në kampionatin anglez qëkur ka marrë drejtimin e Chelsea pas shkarkimit të portugezit Jose Mourinho. Nën drejtimin e tij, kampionët në fuqi të Premier League kanë regjistruar 6 fitore dhe 8 barazime në 14 ndeshjet e fundit të luajtura në kampionat. Kjo ka qenë edhe fitorja e tetë e londinezëve në nëntë përballjet e fundit kundër Aston Villa-s.
Aston Villa-Chelsea 0-4
Shënues: Loftus-Cheek 26’, Pato (p) 48’ , Pedro 46’, 59’
Aston Villa: Guzan, Hutton, Richards, Lescott, Cissokho, Sanchez (Bacuna 67’), Westwood, Gueye, Gil (Grealish 66’), Gestede, Ayew. Trajner: Black.
Chelsea: Courtois, Azpilicueta, Ivanovic, Miazga, Baba, Fabregas, Obi Mikel, Pedro (Clarke-Salter 74′), Loftus-Cheek, Kenedy (Oscar 46’), Remy (Pato 23’). Trajner: Hiddink.
Gjyqtar: Swarbrick
Kartonë të verdhë: Gueye, Cissokho, Sanchez, Hutton, Westwood/ Fabregas
Karton i kuq: Hutton
