Një ditë pas deklaratës së kryeministrit kosovar, Isa Mustafa, se kryeministri serb Vuçiç, nuk dihet nëse do e vizitojë Kosovën, ditën e sotme është konfirmuar vizita zyrtare e tij. Sipas mediave kosovare, Kryeministri serb, Aleksandër Vuçiç do të vizitojë Kosovën në fundjavë, ditën e dielë.
Lideri i listës ‘Srpska’, Marko Gjuriç ka konfirmuar pak më parë për vizitën e kryeministrit serb në Kosovë.
I pranishëm në pjesën veriore të Kosovës, ai tha për mediat serbe se Vuçiç do të vizitojë disa nga vendet të cilat banohen me shumicë serbe.
Sipas Gjuriç, Vuçiç do t’iu drejtohet qytetarëve në Zubi Potok, si dhe do të vizitojë edhe disa vende tjera.
“Ky është një lajm i madh dhe i rëndësishëm për të gjithë qytetarët, sidomos ata në Kosovë. Kryeministri të dielën, më prill 3 do të vizitojë Kosovën ku do të takohet me minatorët e Trepçës, do të vizitojë Zubin Potokun dhe Mitrovicën”, tha Gjuriç për Radio Televizionin e Serbisë, RTS, raportojnë mediat në Kosovë.
Drejtori i Zyrës për Kosovën në Qeverinë e Serbisë po ashtu ka deklaruar se kjo vizitë është një mbështetje e fortë për serbët në Kosovë, siç tha ai “në një kohë të vështirë dhe të paqëndrueshme”.
