Gjatë prezantimit publik për rrugët që do të ndërtohen përgjatë Lumit të Vlorës, kryeministri Rama njëherësh dhe deputet i Vlorës tha se mungesa e rrugëve në këto zona i ka bërë njerëzit analfabetë pasi fëmijët nuk mund të shkojnë në shkollë. “Banorët e këtyre fshatrave janë analfabetë pasi fëmijët nuk kanë mundësi të shkojnë në shkollë për shkak të largësisë dhe rrugës të mbushur me gropa”, theksoi shefi i mazhorancës.
Pas vitesh të tëra braktisje, qeveria do të nisë të vë në jetë një projekt për ndërtimin e rrugëve që sipas kryeministrit Edi Rama do të krijojë një hapësirë të re turistike dhe zhvillimi në funksion edhe të bujqësisë dhe blegtorisë.
Edi Rama tha se kishte shkuar në ato rrugë i shoqëruar nga deputeti Fatmir Toçi i cili në atë zonë ka edhe fshatin e tij. Rruga i ka lënë përshtypjen kreut të qeverisë, të një “shtegu të mbushur me gropa”. “Kadisa pjesë ku rruga nuk mund të thuhet se ekziston ku mungn dhe gjurma e vjetër e saj”, shtoi ai
Aksesi dhe shërbimi ndaj banorëve të këtyre fshatrave është minimal.
“Çfarë ndikimi të rëndë ka pasur braktisja e tyre nga shteti. Dy herë më i madh është numri i analfabetëve në atë zonë sesa mesatarja e qarkut të Vlorës. Aksesi në shkollim është minimal. Edhe mesatarja e atyre që kryejnë studimet e larta në atë zonë është minimale”, tha Rama.
Shpesh herë rruga kthehet edhe në rrezik serioz për jetën e njerëzve që kalojnë në të. Për kë e njeh zonën, në disa segmente të saj, rruga është thuajse e ngrënë saqë krijon terren për aksidente të mundshme. Ndërsa në një krah kufizohet nga male apo banesa, ka pjesë ku rruga bëhet e frikshme për shkak se në krahun e poshtëm ka vetëm gremina dhe asnjë mjet anësor ruajtës.
