Policia e Shkodrës ka ndërmarrë një aksion dje për parkimet e gabuara në rrugën përballë Gjykatës së Shkallës së Parë.
Në aksin “Don Bosko”, ku parkimi i mjeteve motorike është i ndaluar në pjesën përballë Gjykatës, forcat e policisë përmes një aksioni blic kanë vendosur gjoba për të gjitha makinat e parkuara aty. Që në hyrje të rrugës, tabela e sinjalistikës tregon se aty nuk mund të parkosh, shkruan Panorama.
Por kjo sinjalistikë, për shkak edhe të mungesës së një vendi të afërt parkimi, nuk respektohet as nga vetë gjyqtarët e kësaj gjykate, nga prokurorët e as avokatët.
Në pamundësi të një vendi parkimi, ata janë të detyruar t’i parkojnë mjetet e tyre edhe në ato akse ku tabela paralajmëron të kundërtën.
Çdo ditë në këtë aks janë parkuar me dhjetëra makina “VIP”ash të Drejtësisë, pa marrë parasysh tabelën që e ndalon një gjë të tillë. Në këtë mënyrë, Policia e Rendit mësohet se brenda pak minutave ka vendosur mbi 50 masa administrative gjobë për të gjitha mjetet e parkuara në atë vend.
