21 refugjatë me kombësi somaleze, siriane dhe iraniane kanë mbërritur mëngjesin e sotëm në brigjet italiane, ndërkohë që Guardia di Finanza dhe Roja Bregdetare kanë ndaluar dy trafikantët e mundshëm, një shqiptar dhe një grek. Mediat italiane duke cituar autoritetet e vendit fqinj, ngrenë pikëpyetje për rikthimin e mundshëm të trafikut të njerëzve përmes Adriatikut.
Mediat lokale raportojnë se trafikantët i kanë sjellë refugjatët në breg në Castro dhe më pas janë larguar. Pas njoftimit, karabinierët kanë zhvilluar kërkime në tokë, ndërsa motoskafët e Guardia di Finanza dhe të rojës bregdetare kanë filluar kërkimet në det. Në një distancë jo shumë të largët, pak milje më në jug, është identifikuar dhe bllokuar një varkë. Në bord ndodheshin një shtetas grek dhe një shtetas shqiptar, të cilët janë ndaluar për t’u marrë në pyetje. Ka dyshime të forta se ata janë 2 skafistët, që kanë çuar në Castro emigrantët, por ende po hetohet.
Për të ‘gozhduar’ 2 burrat me përgjegjësitë e tyre do të duhet të shqyrtohet me kujdes barka, rreth shtatë metra dhe të kontrollohet për praninë e ndonjë pajisje që mund të ketë shënuar rrugën. Gjithashtu, të rëndësishme do të jenë edhe deklaratat e njerëzve të kapur nga policia dhe identifikimi i mundshëm me anë të fotografive i skafistëve të tyre.
Emigrantët do të dërgohen në qendrën e pritjes “Don Tonino Bello” të Otrantos, ku ekipi anti-emigracion- i përbërë nga policia, karabinieria, Guardia di Finanza dhe Roja Bregdetare do të nisin hetimet.
Vëmendje e veçantë do t’i kushtohet nga ana e gjykatës dhe forcave të rendit këtij zbarkimi të ri, që mund të jetë një episod i izoluar, ose mund të shënojë një rihapje të rrugës emigratore të Adriatikut drejt Italisë, për shkak të mbylljes së kufijve veriorë të Greqisë dhe pranisë së mijëra refugjatëve në ankth për të arritur në Evropën Veriore nga zona të ndryshme të territorit grek.
