Eurokomisioneri për Negociatat e Zgjerimit, Johannes Hahn, deklaroi nga Durrësi se reforma në drejtësi duhet të miratohet përpara pushimeve të verës, në mënyrë që në tetor të shihen rezultatet.
Në një konferencë të përbashkët për shtyp me ministrin e Jashtëm Ditmir Bushati, Hahn tha se reforma në drejtësi është një element kyç dhe duhet një vendim para verës.
“Isha shumë i qartë dje. Bëmë një inventar të realizimit të 5 prioriteteve dhe drejtësia është në zemër të përparësive. Është element kyç dhe na duhet një vendim përpara pushimit të verës. Të respektohen mendimet e Komisionit të Venecias, të respektohet marrëveshja në parim që është arritur dhe të miratohet reforma në drejtësi. Miratimi është hapi i parë, ndërsa i dyti është zbatimi i saj. Duhet zbatimi i mirë që të mund të shohim në tetor rezultatet, që shpresojmë të jenë në drejtimin e duhur. Nëse është kështu, jam optimist”, ka thënë Hahn.
