Kalim stafete mes bashkëatdhetarëve. Të paktën është kjo që synon të bëjë Franck Ribery, i cili ka përzgjedhur Kinsley si pasardhës të tij te Bayern Munich.
“Shpresoj që Coman të mund të shndërrohet në Riberyn e ri. Deri më tani, për atë nuk ka qenë e lehtë pasi te PSG nuk luante ndërsa te Juventusi luajti shumë pak.
Këtu në Munich, krejt ndryshe, ai është i qetë dhe luan futboll. Po bën një punë shumë të mirë por ka ende vend për përmirësim. Coman është vetëm 19 vjeç dhe mund të mësojë shumë nga më të vjetrit”, deklaroi francezi në një intervistë për “Goal.com”. Sipas Ribery, 19-vjeçari Coman është pasardhësi i tij te Bayern Munich. Ish-marsejezi, më pas u përqendrua te sfida e Champions League e zhvilluar kundër Juventusit. “Futbollistë si puna ime, Xabi Alonso, Müller apo Lahm janë shumë të rëndësishëm në situata si ajo.
Në 45 minuta mund të ndodhë gjithçka, duhej vetëm të sulmonim, sulmonim dhe të sulmonim. Është diçka që nuk duhet harruar: i shënuam Juventusit plot katër gola. Sa deçiziv ishin zëvendësimet? Vitin e kaluar mungonin. Në gjysmëfinale kundër Barcelonës, unë, Alaba dhe Robben ishim të dëmtuar. Ndërsa tani kemi më shumë kualitet dhe Guardiola mund të bëjë rotacion futbollistësh. Trajneri dëshiron të fitojë Championsin, njëlloj si ne.
Vetëm ajo i mungon që të largohet i kënaqur për te Manchester City”, u shpreh Franck Ribery. Ribery është i bindur se Guardiola, ndonëse në ikje, e kërkon po aq sa futbollistët fitimin e Champions League. Në përfundim, Ribery sqaroi se nuk u druajt asnjëherë se mund të përfundonte parakohe karrierën e tij për shkak të dëmtimeve të shumta. “Ishte e vështirë për mua të prisja momentin që të zbrisja sërish në fushë.
Vitin e fundit isha shpesh herë i mërzitur, ndjeja mungesën e të luajturit futboll. Por, tani ndjehem fizikisht në 100% të formës time. Nuk di edhe sa kohë do të mund të luaj akoma, por do të vazhdoj për sa kohë fiziku im do të më lejojë. Kam ende uri për sukses”, përfundoi francezi Franck Ribery.
