U deshën 19 vjet dhe një ndërhyrje e mediave holandeze që Policia e Elbasanit të identifikojë dhe shpallë në kërkim autorët e trafikimit të Zyra Hidës për prostitucion, tashmë e vrarë.
“Shtetasja u identifikua nga familjarët si Zyra Hida, e datëlindjes 1966, banuese në Elbasan, e larguar nga banesa në vitin 1995. Specialistët e Sektorit kundër trafiqeve të paligjshme, në Drejtorinë Vendore të Policisë Elbasan, menjëherë nisën hetimin dhe rezultoi se viktima nga viti 1995 deri në vitin 1997 ishte trafikuar drejt shtetit italian dhe më pas në Holandë me qëllim shfrytëzimin e saj për prostitucion”, -bëri të ditur Policia e Elbasanit.
Policia ka shpallur në kërkim shtetasit me iniciale SH.M dhe G.S dhe po punohet për kapjen e tyre pasi akuzohen për trafik njerëzish.
Zyra Hida e vrarë në vitin 1997 në Amsterdam, u identifikua nga familjarët e saj në Elbasan, falë disa fotove të publikuara nga gazetarët holandezë të televizionit ‘SBS’.
(Boldnews)
