Falimenti për shkak të keqadministrimit të dy kompanive të mëdha Armo dhe Kurum ka rritur shqetësimet tek bankat e nivelit të dytë përsa i përket kredive të këqija.
Këtë fakt e pohoi guvernatori i Bankës së Shqipërisë Gent Sejko, gjatë raportimit në Komisionin Paralamentar të Ekonomisë dhe Financave për vitin 2015. Ai kërkoi miratimin e ligjit të falimentit për të ndihmuar bankat e nivelit të dytë.
“Për ato raste, të cilat janë vërtet pa asnjë perspektivë pozitive, miratimi i ligjit të falimentit do të jetë një hap tjetër cilësor, që do të ndihmojë të gjithë procesin, kryesisht bankat dhe sistemin financiar”- tha guvernatori Sejko.
Ndërkohë deputeti i mazhorancës Anastas Angjeli i sugjeroi Bankës së Shqipërise të përmirësojë investimet dhe klimën e binzesit.
“BSH të rrisë influencën e saj për të përmirësuar investimet në vend. Të ketë fokus drejt përmirësimit të Klimës së biznesit, të fokusohet edhe në kredinë për ekonomi, reduktim i kredive me probleme, vijim i forcimit të mbikëqyrjes dhe rritjes së transparences.”- u shpreh Angjeli.
Ndryshe nga parashikimet e qeverisë se rritja ekonomike për 2016 do të jetë 3.4 %, guvernatori Sejko është më me këmbë në tokë duke thënë se rritja nuk i kalon 3 %.
