Identifikohet vajza shqiptare e vrarë në Hollandë në vitin 1997. Pas publikimit të fotos nga gazetarët holandezë dhe raportimit të ngjarjes në mediat shqiptare, familjarët e vajzës bënë identifikimin e saj.
Bëhet fjalë për Zyra Hida, e datëlindjes 1966. Ajo është nga qyteti i Elbasanit. Vajza është vrarë në Amsterdam në korrik të vitit 1997. Sipas së motrës, Xhuljeta Hida, ajo është martuar që kur ishte 14 vjeçe në fshatin Muriqan të Cërrikut. Por gjërat nuk kanë shkuar mirë. Mes çiftit ka pasur grindje të vazhdueshme e për pasojë ka ardhur edhe divorci.
Më pas janë ribashkuar sërish dhe kanë qëndruar tek shtëpia e motrës së burrit në një lagje periferike të Elbasanit. Këtu e ndjera është përballur me një realitet akoma më të hidhur. Familja kërkon nga shteti që të ndihmojë në ardhjen e eshtrave për të kryer varrimin në Elbasan.
Xhuljeta Hida deklaron se motra e saj, Zyrah Hida, u trafikua në Itali, nga bashkëshorti i saj Petrit Bani. Kjo pasi me të, kishte patur konflikte të vazhdueshme.
Xhuljeta, tregon se qëllimi që Zyrahja ishte shitur, ishte për t’u shfrytëzuar për prostitucion. “Është rrahur, është keqtrajtuar, është përbuzur nga bashkëshorti dhe njerëzit e tjerë të tij. Ka bashkëjetuar njëkohësisht me gruan e dytë të bashkëshortit. Ka ndarë një krevat më të. Është rikthyer sërish në familje. Por aty nuk e kanë pranuar. Është detyruar të kthehet sërish tek bashkëshorti dhe aty kanë nisur negociatat për ta shitur si prostitutë në Itali. Është shitur për 1 milionë lekë të vjetra”, tha ajo për mediat.
