Aktorja e njohur, Olta Gixhari, është paraqitur sot pranë komisariatit nr. 1 të Policisë së Tiranës, për të dhënë dëshminë e saj, mbi ngjarjen dhe konfliktin e gazetarit të “ABC” Eni Shehu me drejtorin e Teatrit Kombëtar, Hervin Çuli.
Mund të themi se, Olta gjendet mes dy zjarreve, pasi i duhet të dëshmojë çfarë ka parë në përplasjen fizike mes Shehut dhe Çulit, njëri miku i saj më i ngushtë dhe tjetri, regjisori i shfaqjes ku ajo ishte protagoniste “Tri Motrat”, e njëkohësisht drejtori i TK-së, shkruan “Story.al”.
Gazetari Shehu, depozitoi denoncimin e tij pranë Drejtorisë së Përgjithshme të Policisë, ku deklaroi se, ishte dhunuar nga Çuli në ambientet e Teatrit Kombëtar.
Ndërkohë Drejtori i këtij institucioni, u vetëmbrojt duke thënë se, Shehu ka qenë i droguar në momentin e konfliktit. Vetë gazetari e mohoi këtë fakt, duke u shprehur se, është i gatshëm për të bërë testin e drogës.
