E ashpër ka qenë deputetja Mesila Doda, në një postim në profilin e saj Facebook, lidhur me reformën në drejtësi dhe Byronë e Hetimit. Ajo ka vënë në pah betejën e liderëve politik mes njëri- tjetrin që nuk sjell asnjë të mirë për vendin.
“Reforma në drejtësi dhe Byroja Kombëtare e Hetimit duhet të dalë urgjentisht nga duart e atyre që kërcënojnë dhe që sillen si laca lagjesh”, shkruan Doda.
I quan “Laca lagjesh” klasën politike e duket se është e mërzitur ndaj sistemit gjyqësor. “Reforma në drejtësi nuk mund të jetë peng i pazarit se cili emëron më shumë gjyqtarë, prokurorë e drejtues prej partive tuaja. Sistemi ynë po dështon nga kjo etja juaj dhe gara e marrë për pushtet, duke thyer çdo rregull demokratik në vend dhe duke harruar se pushteti raportohet me njerëzit, me popullin, jo thjesht në raport sherresh me kundërshtarin”, shkruan deputetja Doda.
Sipas saj kjo është tradhëtia e fundit që klasa politike po i bën këtij vendi.
Ja çfarë shkruan ajo:
Politikanë të lartë si laca lagjesh
Pak nga pak klasa politike po ja arrin të shkëputet krejtësisht nga realiteti dhe po e transferon nevojën për ndryshim real në betejë bajlozësh mes vedi. Eshtë dialog në distancë i përçudnuar e fals, ajo që po ndodh mes liderve të sotëm politik.
Reforma në drejtësi nuk mund të jetë peng i pazarit se cili emëron më shumë gjyqtarë, prokurorë e drejtues prej partive tuaja. Sistemi ynë po dështon nga kjo etja juaj dhe gara e marrë për pushtet, duke thyer çdo rregull demokratik në vend dhe duke harruar se pushteti raportohet me njerëzit, me popullin, jo thjesht në raport sherresh me kundërshtarin.
Ky vend zhytet përditë e më shumë në korrupsion, sepse secili prej jush i gjendet në krah ushtarëve respektive që kanë kapur për fyti drejtësinë dhe qytetarin pa përkrahje. Nëse reformë në drejtësi do të thotë prapë betejë bajlozësh dhe zevendësim i disa të korruptuarve me disa të tjerë, atëherë kjo është tradhëtia e fundit që po i bëni këtij vendi.
Kasta nuk ka asnjë qëllim të vetëdorëzohet, thjesht nuk bien dakord në pazar dhe flasin gjoja në emër të parimeve.
Reforma në drejtësi dhe Byroja Kombëtare e Hetimit duhet të dalë urgjentisht nga duart e atyre që kërcënojnë dhe që sillen si laca lagjesh.
