Loftus Hall është një kështjellë me 22 dhoma gjumi që gjendet në gadishullin Huk në qarkun Ueksford. Qyshkur është braktisur rreth tridhjetë vjet më parë, kjo ndërtesë e madhe ka pasur vetëm riparime strukturore.
Loftus Hall është ndërtuar në vitin 1350 nga familja Redmond dhe, derisa ishte blerë nga familja Loftus, 300 vjet më pas, kështjella mbante emrin e familjes së parë. por, tek në vitin 1766 kjo kështjellë thuhet se u mallkua me një prani të mbinatyrshme, e cila gjendet aty edhe sot e kësaj dite. Asokohe nuk ishte e rrallë që detarët të kërkonin strehim në shtëpi të ndryshme gjatë stuhive. Prandaj, kur një i huaj erdhi që të kërkonte strehim, familja Tottenham, e cila banonte aty asokohe, ia hapi atij derën.
Thuhet se stuhia vazhdoi me javë të tëra. Gjatë kësaj kohe, i huaji u afrua me Anne-n, njërën prej vajzave të familjes Tottenham. Derisa ishin duke luajtur me letra një mbrëmje, Anne vërejti se njeriu në të cilin ishte dashuruar, në vend të këmbëve, kishte thundra. Pasi që kuptoi se bëhej fjalë për vetë djallin, ajo filloi që të bërtiste. Menjëherë i huaji u shndërrua në një top të zjarrtë dhe doli nga tavani. Që nga ajo kohë në këtë ndërtesë u hetua prania e shpirtrave. Anne u trondit aq shumë nga kjo ngjarje, saqë u çmend dhe u mbajt e mbyllur për 19 vjet derisa vdiq. Edhe shpirti i saj shihet në kështjellë.
