Rasim Doda, ish gjyqëtari i Sarandës ka ngritur akuza ndaj ish- Ministrit të Drejtësisë, Nasip Naço se ky i fundit e ka përgjuar dhe i ka ngritur kurth për akuzën e korrupsionit që po gjykohet. Ai ka ngritur pretendimet në gjyq se ish-ministri Naço së bashku me kallëzuesin Hasan Bushi dhe shefin e IT ikanë bërë të mundur që gjyqtari Doda të binte në kurth e të përfitonte 80 milion lekë.
Për të vërtetuar këtë pretendim Doda ka paraqitur para gjykatës disa komunikime telefonike të ish ministrit Naço me shtetasin Hasan Bushi dhe shefit të informatikës së gjykatës Sarandë me kallëzuesin.
Këto komunikime, pretendoi Doda, faktojnë se ndërmjet kallëzuesit dhe shefit të IT ka patur njohje të mëparshme çka i jep atij të drejtë të pretendojë se i është ndërhyrë padijeni në kompjuterin e zyrës.
Aktualisht ndaj Rasim Dodës janë zhvilluar 19 seanca gjyqësore ndërsa ai akuzohet se kërkoi 80 milion lekë në këmbim të një vendimi në favor të kallëzuesit Hasan Bushi.
