Është vendosur masa arrest me burg për invalidin që shtypi një çift bashkëshortësh dhe plagosi disa të tjerë, tre ditë më parë në tregun e Milotit.
Gjykata e Kurbinit ka vendosur se 58-vjeçari Pashk Vokrri, i cili drejtonte makinën pa pasur patentë, duhet të qëndrojë në burg. Ndërsa nga ana e palës mbrojtëse mësohet se nuk është marrë parasysh kërkesa e avokates për një masë lehtësuese për shkak se Vokrri ishte person me aftësi të kufizuar.
Në seancën gjyqësore, Vokrri nuk tha asnjë fjalë duka ja lënë mbrojtjen avokates së tij. Ajo tha se i moshuari nuk mund të qëndrojë në burg për shkak të problemeve shëndetësore që ai ka dhe faktit që i duhet një kujdestare për tu kujdesur për të, pasi 58-vjeçari është me karrocë.
Shoferi invalid drejtonte makinën pa pasur një patentë, ndërsa sipas dëshmisë së tij dhënë më herët për grupin hetimor, gjithçka ka ndodhur nga pakujdesia, për shkak se Vokrri ka ngatërruar pedalen e frenave me atë të gazit. Ai kishte një makinë të modifikuar për persona invalid, por modifikimin ja kishte bërë vetë ai pa e kaluar kontrollin teknik të automjetit.
