Terrorizmi ka goditur përsëri. Këtë herë është gjunjëzuar Brukseli.
Pas sulmeve të Parisit të 13 nëntorit të kaluar dhe arrestimit të Salah, një nga përgjegjësit e atyre sulmeve, kryeqyteti belg është goditur sot nga një seri sulmesh të koordinuara. Të paktën dy shpërthime janë verifikuar në aeroportin Zaventem, kur kanë mbetur të vrarë 13 persona. Disa dëshmitarë kanë thënë se kanë dëgjuar të bërtitura në gjuhën arabe para dy shpërthimeve, që janë pasuar nga të shtëna. Gjysmë ore pas sulmit në aeroport është sulmuar stacioni i metrosë Maelbek, dy hapa larg Komisionit Europian: bilanci provizor është prej 15 viktimash, që janë shkaktuar nga një shpërthimi i një terroristi, i cili ka mbetur gjithashtu i vrarë.
Belgjika dhe gjithë Europa janë tronditur përsëri. Kombëtarja belge ka ngushëlluar familjet e viktimave me një mesazh të postuar në rrjetin social twitter. “Të gjithë bashkë, mendja jonë është te viktimat. Futbolli nuk është i rëndësishëm në një ditë si kjo. Stërvitja është anuluar”, lexohet në profilin e Federatës Belge të Futbollit. Ndërkohë, pritet që të anulohet edhe miqësorja e 29 marsit kundër Portugalisë ashtu si edhe disa evenimente të tjera sportive që pritej të zhvilloheshin në ditët në vazhdim në Belgjikë.
