Derbi i shqiptarëve në Turqi, Cikalleshi shënon eurogolin e barazimit

Është mbyllur në barazim 1-1 supersfida e javës së 26-të në Super Ligën turke, mes Konyaspor dhe Instambul Basaksehir.

Një përballje direkte mes dy ekipeve pretendente për të siguruar vendin në Kupat e Europës. Por, edhe më e veçantë është shndërruar kjo sfidë për faktin se në secilin prej dy ekipeve aktivizohet nga një futbollist i Përfaqësueses së Shqipërisë.

Është ndarë në barazi totale përballja mes kuqezinjve, Alban Mehas që luan me Konyaspor dhe Sokol Cikalleshit në anën e Instambul Basaksehir. Gjithsesi, në planin individual, ka qenë Cikalleshi ai që ka mbizotëruar ndaj Mehas, teksa falë eurogolit të realizuar nga sulmuesi kavajas në minutën e 89’ të takimit, skuadra e Instambul Basaksehir mundi të sigurojë pikën e vetme të takimit.

Ndërkohë që Meha e nisi lojën si gjithmonë, nga minua e parë, për tu zëvendësuar në minutën e 80’, Cikalleshi vijon të mbetet thjeshtë një alternativë zëvendësuese për skuadrën e tij. Qendërsulmuesi i Përfaqësueses së Shqipërisë u aktivizua në fushë në minutën e 62’, për të realizuar golin e barazimit 27 minuta më pas. Ky i sotmi ishte goli i pestë i Cikalleshit në Super Ligën turke, në 23 ndeshje të luajtura, vetëm 4 prej të cilave si titullar, ndërkohë që ka realizuar edhe 7 gola në 8 ndeshjet e vlefshme për Kupën e Turqisë.