Rreth 25% e mësuesve në të gjithë vendin, zotërojnë njohuri shumë të kënaqshme, 64% e mësuesve zotërojnë njohuri të kënaqshme, ndërsa 12% e mësuesve kanë nevoja të domosdoshmeshme për përmirësim ndërsa nivelin më të mirë të mësuesve e ka qyteti i Beratit.
Pas testimit të 17.613 mësuesve në gjithë vendin, Instituti i Zhvillimit të Arsimit prezantoi sot, Raportin Kombëtar të Identifikimit të Nevojave për Trajnimin e Mësuesve dhe Drejtuesve, ku pas qytetit të beratit me nivelin më të mire renditej më tej edhe Shkodra, Korça, Fieri, Tirana Qark. Ndërsa qytetet me nivelin më të ulët renditen Kukësi, Dibra dhe Vlora.
Ministrja e Arsimit dhe Sportit, Lindita Nikolla, gjatë fjalës së saj deklaroi se përmes këtij procesi, për herë të parë, ofrohet për çdo drejtori harta kombëtare e nevojave për zhvillim profesional e detajuar për çdo shkollë dhe databaza e të dhënave për të kuptuar nevojat e mësuesve.
“Për herë të parë kemi një raport kombëtar për evidentimin e nevojave të mësuesve dhe drejtuesve në arsimin parauniversitar. Ky është një dokument nga i cili zhvillojmë të gjitha përgjegjësitë që na takojnë përpara 500 mijë nxënësve dhe prindërve të tyre, duke u thënë të vërtetat reale që mbajnë emrin e çdo mësues, shkollë, DAR/ZA. Por, ajo që është e rëndësishme, duke u angazhuar në kohë, me tregues të matshëm, për të përmirësuar situata që kanë nevojë për ndërhyrje emergjente e më pas për të ndërtuar një sistem permanent, bashkëkohor për kualifikimin e të gjithë mësuesve”, tha Nikolla.
Ministrja tha se nga raportimi që MAS kreu pranë përfaqësuesve të Komisionit Evropian në kuadër të Nënkomitetit për “Inovacionin, Shoqërinë e Informacionit dhe Politikat Sociale”, konkluzionet nga ekspertët e KE-së si dhe rekomandimet ishin pozitive.
“Shqipëria inkurajohet të vazhdojë reformën në arsimin parauniversitar dhe ti kushtojë një rëndësi të veçantë trajnimit dhe kualifikimit të mësuesve. Ata kanë ofruar partneritet të plotë dhe ekspertizë për të na shoqëruar në hapat e mëtejshëm, për t’ju përgjigjur kësaj situate dhe detyrave që lindin nga ky raport”, tha ministrja Nikolla.
Po ashtu, ajo renditi problematikat e skemës së trajnimit të mësuesve ku sipas saj, janë 51 agjenci trajnuese të licencuara gjatë vitit 2012 dhe 2013, të cilat ofrojnë 739 module trajnimi për mësuesit.
Në fjalën e saj, Ministrja përmendi edhe rëndësinë e krijimit të shkollës së drejtorëve, duke theksuar se do të ketë një diplomë për të gjithë drejtuesit që janë në sistem, por edhe për ata që duan të jenë pjesë e drejtimit të shkollave.
Debati shkencor për skemën e re të zhvillimit profesional të mësuesve, do të vijojë javën që vjen, në konferencën e parë ndërkombëtare mbi zhvillimin profesional të mësuesve, ku ekspertë ndërkombëtare nga vende të zhvilluara evropiane, por dhe nga vende të rajonit, rektorë e pedagogë universitetesh do të mblidhen për të ofruar ekspertizën e tyre në lidhje me skemën ere të zhvillimit profesional, sipas standardeve evropiane.
