Shoqata e Gjuetarëve organizoi sot një protestë para kryeministrisë në kryeqytet, kundër moratoriumit të Gjuetisë të miratuar nga qeveria. Protestuesit janë pro ligjit por kundër shtyrjes së moratoriumit, i cili sipas tyre është ekstremi i zbatimit.
Pjesëmarrësit në protestë theksojnë se zgjatja e afatit të moratoriumit është paaftësi e qeverisë.
“Menaxhimi i gjuetisë hap rrugë për zhvillimin e mjedisit. Jo moratorium. I kërkojmë kryeministrit të mos shtyjë moratoriumin për gjuetinë. Kjo është një masë ekstreme”, shprehen gjuetarët.
Sipas tyre, ne jemi i vetmi vend në Europë që kërkojmë rregullimin e gjuetisë me veprime ekstreme. “Ndal moratoriumit, pro zbatimit të ligjit, pro rregullimit të gjuetisë. Të forcohen rregullat, dhe të zbatohen për të gjithë, jo për disa po e për disa jo. Nuk janë gjuetarët ata që shkelin ligjin, por ligji nuk zbatohet, dhe ne kërkojmë zbatimin e tij. Qeveria ka treguar se ka vullnet të mirë dhe bën mrekullira. Moratoriumi është mungesë e vullnetit”, u shprehën gjuetarët.
