Inter rinovon me Pirelli-n, Thohir “blindon” Mancini-n

“Sot është një ditë e veçantë sepse kemi zgjatur bashkëpunimin me partnerin historik Pirelli”. Këto kanë qenë fjalët e Erick Thohir gjatë konferencës për shtyp të zhvilluar në qendrën stërvitore të zikaltërve ku presidenti indonezian ka lajmëruar rinovimin e kontratës së sponsorizimit për pesë vitet e ardhshme me Pirelli. Në krah të tij kanë qenë Massimo Moratti dhe Marco Tronchetti Provera. “Janë 21 vite që Inter dhe Pirelli bashkëpunojnë. Është një marrëdhënie sponsorizimi që është kthyer në miqësi me kalimin e viteve. Bëhet fjalë për dy ndërmarrje italiane me rrënjë të thella milaneze”, ka thënë Thohir. Kjo marrëveshje me Pirelli, që do të mbetet sponsori i vetëm ekskluziv në fanellën zikaltët, me Nike që do të jetë furnizuesi zyrtar, do të thotë vazhdimësi për “projektin” e Thohir: “Jemi bashkë sepse po rindërtojmë, sepse synojmë Champions League, sepse duam të luftojmë dhe të arrijmë objektivat. Nëse nuk do t’ia dalim, nuk do të jetë fundi i botës. E rëndësishme është të punojmë dhe të ndërtojmë. Mancini? Do të qëndrojë me ne edhe nëse nuk dalim të tretët sepse ka një kontratë. Ne si klub e mbështesim në të gjitha mënyrat”, ka përfunduar numri një i Inter.